ກ່ອນການເດີນທາງຢ້ຽມຢາມສາທາລະນະລັດເອກວາດໍທາງລັດຖະກິດຂອງທ່ານສີຈິ້ນຜິງ ປະທານປະເທດຈີນ, ໜັງສືພິມThe Telegraph ຂອງເອກວາດໍໄດ້ລົງພິມບົດຄວາມຂອງທ່ານສີຈິ້ນຜິງທີ່ພາດຫົວວ່າ "ສ້າງຂົວຕໍ່ແຫ່ງໃໝ່ເພື່ອມິດຕະພາບແລະການຮ່ວມມືຈີນ-ເອກວາດໍ"ໃນວັນທີ 16 ພະຈິກນີ້.
ບົດຄວາມລະບຸວ່າ: ນັບແຕ່ຈີນ-ເອກວາດໍສ້າງຕັ້ງສາຍພົວພັນທາງການທູດເປັນເວລາ 36 ປີມານີ້, ສອງປະເທດໄດ້ສ້າງຄວາມໄວ້ເນື້ອເຊື່ອໃຈກັນທາງການເມືອງແລະມິດຕະພາບອັນເລິກເຊິ່ງ. ການແລກປ່ຽນດ້ານການຄ້າລະຫວ່າງສອງປະເທດໄດ້ພັດທະນາຢ່າງວ່ອງໄວແລະຕໍ່ເນື່ອງ, ຈີນໄດ້ກາຍເປັນຄູ່ຄ້າໃຫຍ່ອັນດັບ 3 ຂອງເອກວາດໍ. ການຮ່ວມມືດ້ານການລົງທຶນແລະການລະດົມທຶນຂອງສອງຝ່າຍກໍໄດ້ເຕີບໂຕຢ່າງວ່ອງໄວແລະເອກວາດໍເປັນໜຶ່ງໃນບັນດາປະເທດອາເມລິກາລາຕິນທີ່ດຶງດູດການລົງທຶນແລະການລະດົມທຶນຈາກຈີນໄດ້ຫຼາຍກວ່າໝູ່, ຂະນະທີ່ການແລກປ່ຽນແລະຮ່ວມມືດ້ານວັດທະນະທຳລະຫວ່າງສອງປະເທດກໍຂະຫຍາຍຕົວຢ່າງບໍ່ຢຸດຢັ້ງ.
ບົດຄວາມເນັ້ນວ່າ: ຫວັງວ່າການຢ້ຽມຢາມເທື່ອນີ້ຈະຊຸກຍູ້ສາຍພົວພັນຈີນ-ເອກວາດໍກ້າວຂຶ້ນສູ່ລະດັບໃໝ່. ສອງປະເທດຄວນເປັນຄູ່ຮ່ວມມືທີ່ດີຈິງໃຈແລະໄວ້ເນື້ອເຊື່ອໃຈກັນ, ເປັນຄູ່ຮ່ວມມືທີ່ດີທີ່ພັດທະນາພ້ອມກັນ,ບົນພື້ນຖານນ້ຳໃຈມິດຕະພາບຕະຫຼອດໄປແລະເປັນຄູ່ຮ່ວມມືທີ່ດີໃນການຮ່ວມມືໃຕ້ໆ. ພາຍໃຕ້ສະຖານະການໃໝ່,ຈີນຍິນດີຮ່ວມກັບເອກວາດໍພະຍາຍາມສ້າງຂົວຕໍ່ທີ່ໝັ້ນຄົງເພື່ອອຳນວຍຄວາມສະດວກໃຫ້ແກ່ການໄປມາຫາສູ່ກັນຢ່າງມີໄມຕີຈິດມິດຕະພາບລະຫວ່າງປະຊາຊົນສອງຊາດ ແລະຊຸກຍູ້ສາຍພົວພັນສອງປະເທດຂະຫຍາຍຕົວສູງຂຶ້ນກວ່າເກົ່າ.
 |
