ວັນທີ 16 ພະຈິກນີ້, ທ່ານວຼາຕິເມຍ ປູຕິນ ປະທານາທິບໍດີຣັດເຊຍໄດ້ລົງນາມໃນລັດຖະດຳລັດປະທານາທິບໍດີ, ຖອນອອກຈາກການເປັນປະເທດສະມາຊິກສານອາຍາສາກົນທີ່ຕັ້ງຢູ່ເມືອງເຮັກປະເທດໂຮນລັງ. ທ່ານປູຕິນໄດ້ສັ່ງໃຫ້ພາກສ່ວນທີ່ກ່ຽວຂ້ອງແຈ້ງຕໍ່ເລຂາທິການໃຫຍ່ອົງການສະຫະປະຊາຊາດວ່າຣັດເຊຍບໍ່ຕ້ອງການເປັນປະເທດສະມາຊິກຂອງ "ກົດລະບຽບໂຣມສານອາຍາສາກົນ" ອີກ.
ຂະນະທີ່ກະຊວງການຕ່າງປະເທດຣັດເຊຍກໍໄດ້ອອກຖະແຫຼງການໃນເວັບໄຊຂອງຕົນວ່າ, ສານອາຍາສາກົນໄດ້ສ້າງຄວາມຜິດຫວັງໃຫ້ແກ່ປະຊາຄົມໂລກ, ຫຼັງບໍ່ໄດ້ເປັນອົງການຈັດຕັ້ງປະຕິບັດກົດໝາຍທີ່ເປັນເອກະລາດຢ່າງແທ້ຈິງແລະມີອິດທິພົນ, ປະຕິບັດວຽກງານດ້ວຍຄວາມອະຄະຕິແລະບໍ່ມີຜົນສັກສິດ.
ໃນທ້າຍເດືອນຕຸລາຜ່ານມາ, ສາມປະເທດໃນອາຟຼິກາຄືບູຣູນດີ, ອາຟຼິກາໃຕ້ແລະກຳບີກໍໄດ້ປະກາດຖອນອອກຈາກສານອາຍາສາກົນແລ້ວ, ທັງໄດ້ຕຳໜິວ່າສານດັ່ງກ່າວກາຍເປັນເຄື່ອງມືຂອງປະເທດຕາເວັນຕົກທີ່ຕັດສິນດ້ວຍຄວາມບໍ່ເປັນທຳຕໍ່ອາຟຼິກາ.