ວັນທີ 17 ພະຈິກນີ້ຢູ່ນະຄອນຫຼວງປັກກິ່ງ ສປ ຈີນ, ທ່ານໂກ່ວເຊີງຄຸນ ທີ່ປຶກສາແຫ່ງລັດຈີນ, ລັດຖະມົນຕີກະຊວງຄວາມສະຫງົບຈີນໄດ້ພົບປະກັບທ່ານສົມແກ້ວ ສີລະວົງ ລັດຖະມົນຕີກະຊວງປ້ອງກັນຄວາມສະຫງົບລາວ.
ທ່ານໂກວເຊີງຄຸນກ່າວວ່າ, ສອງຝ່າຍຕ້ອງໄດ້ປະຕິບັດຕາມຄວາມຮັບຮູ້ທີ່ເປັນເອກະພາບກັນຂອງຜູ້ນຳພັກແລະລັດສອງປະເທດໃຫ້ດີ, ທັງເລັ່ງສ້າງກົນໄກພົບປະກັນໃນລະດັບກະຊວງ, ລົງເລິກການຮ່ວມມືການປະຕິບັດກົດໝາຍສອງຝ່າຍຢູ່ເຂດແມ່ນ້ຳຂອງຢ່າງບໍ່ຢຸດຢັ້ງ, ຂະນະດຽວກັນກໍສຸມໃສ່ຮ່ວມມືປ້ອງກັນແລະຕໍ່ຕ້ານລັດທິກໍ່ການຮ້າຍແລະອາຊະຍາກຳຂ້າມຊາດເຊັ່ນຄ້າຂາຍຢາເສບຕິດແລະອື່ນໆໃຫ້ມີປະສິດທິຜົນ, ຮັກສາຄວາມປອດໄພໃຫ້ແກ່ພົນລະເມືອງ, ອົງການຈັດຕັ້ງແລະໂຄງການກໍ່ສ້າງສຳຄັນຂອງສອງຝ່າຍຢ່າງແທ້ຈິງ, ຕັ້ງໜ້າເຮັດໃຫ້ຍຸດທະສາດ "ໜຶ່ງແລວທາງໜຶ່ງເສັ້ນທາງ" ເຊື່ອມຈອດກັບນະໂຍບາຍພັດທະນາຂອງປະເທດລາວ, ແລະຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນກັບລາວໃຫ້ລົງສູ່ລວງເລິກ.
ທ່ານສົມແກ້ວ ກ່າວວ່າ, ຍິນດີເພີ່ມທະວີການຮ່ວມມືໃນການປະຕິບັດກົດໝາຍກັບຈີນຕື່ມອີກ, ແລະສຸມໃສ່ຊຸກຍູ້ໃຫ້ສາຍພົວພັນລະຫວ່າງສອງປະເທດໃຫ້ຂະຫຍາຍຕົວຢ່າງບໍ່ຢຸດຢັ້ງ.
 |
