ວັນທີ19ພະຈິກນີ້,ທ່ານສີຈິ້ນຜີງ, ປະທານປະເທດຈີນໄດ້ພົບປະກັບທ່ານວຼາດີເມຍ ປູຕິນ ປະທານາທິບໍດີຣັດເຊຍຢູ່ນະຄອນຫຼວງລີມາປະເທດເປຣູ.
ທ່ານສີຈິ້ນຜີງກ່າວວ່າ,ນັບແຕ່ຕົ້ນປີນີ້ເປັນຕົ້ນມາ, ຈີນແລະຣັດເຊຍໄດ້ຮ່ວມກັນສະເຫຼີມສະຫຼອງການເຊັນ "ສົນທິສັນຍາມິດຕະພາບແລະການຮ່ວມມືຖານບ້ານໃກ້ເຮືອນຄຽງຈີນ-ຣັດເຊຍ"ຄົບຮອບ15ປີແລະສາຍພົວພັນຄູ່ປະສານງານຍຸດທະສາດຄົບຮອບ20ປີ, ທັງໄດ້ເພີ່ມທະວີການປະສານງານຍຸດທະສາດຢ່າງຮອບດ້ານ,ເພື່ອຊຸກຍູ້ໃຫ້ສອງປະເທດພັດທະນາພ້ອມກັນ,ເຊັ່ນດຽວກັນກໍ່ໄດ້ເພີ່ມຄວາມເຂັ້ມແຂງຂອງກຳລັງສັນຕິພາບແລະຄວາມເປັນທຳໃນໂລກ. ຈີນຍິນດີຮ່ວມກັບຣັດເຊຍພະຍາຍາມຮ່ວມກັນ, ຮັກສາການໄປມາຫາສູ່ກັນລະຫວ່າງການນຳຂັ້ນສູງຢ່າງໃກ້ຊິດໃນປີໃໝ່, ເພີ່ມທະວີການຊ່ວຍຊູຍູ້ໜູນກັນ, ເພີ່ມທະວີຄວາມໄວ້ເນື້ອເຊື່ອໃຈກັນດ້ານການເມືອງແລະຍຸດທະສາດ,ສຸມໃສ່ເຊື່ອມໂຍງຍຸດທະສາດພັດທະນາລະຫວ່າງສອງປະເທດ, ແລະຮ່ວມມືເຊື່ອມໂຍງການສ້າງ "ໜຶ່ງແລວທາງໜຶ່ງເສັ້ນທາງ"ກັບສະຫະພັນເສດຖະກິດເອີລົບ-ອາຊີ, ເພີ່ມທະວີການປະສານສົມທົບກັນໃນວຽກງານສາກົນ, ຊຸກຍູ້ສັນຕິພາບແລະສະຖຽນລະພາບຂອງໂລກ.
ທ່ານວຼາດີເມຍ ປູຕິນກ່າວວ່າ,ສາຍພົວພັນທີ່ເພີ່ມສູ່ລະດັບສູງລະຫວ່າງຣັດເຊຍກັບຈີນມີຄວາມໝາຍສຳຄັນຕໍ່ສັນຕິພາບແລະສະຖຽນລະພາບຂອງໂລກ,ສອງຝ່າຍຄວນຮັກສາການໄປມາຫາສູ່ກັນລະຫວ່າງການນຳຂັ້ນສູງຢ່າງໃກ້ຊິດ. ຣັດເຊຍຫວັງຮ່ວມກັບຈີນພ້ອມກັນຊຸກຍູ້ການເຊື່ອມໂຍງການສ້າງສະຫະພັນເສດຖະກິດເອີລົບ-ອາຊີກັບ "ໜຶ່ງແລວທາງໜຶ່ງເສັ້ນທາງ".ຣັດເຊຍແລະຈີນຈະເພີ່ມທະວີການປະສານງານໃນວຽກງານຂອບຫຼາຍຝ່າຍ, ເຊັ່ນອົງການເອເປັກແລະອື່ນໆ.
ນອກນີ້,ປະມຸກລັດທັງສອງປະເທດຍັງໄດ້ແລກປ່ຽນຄວາມຄິດຄວາມເຫັນຢ່າງເລິກເຊິ່ງກ່ຽວກັບບັນຫາສາກົນແລະພາກພື້ນທີ່ສົນໃຈຮ່ວມກັນ,ໂດຍໄດ້ປັນເອກະພາບກັນວ່າຕ້ອງຮັກສາສັນຕິພາບແລະຄວາມໝັ້ນຄົງຢູ່ພາກພື້ນອ້ອມຂ້າງຂອງສອງປະເທດ ເຊັ່ນ ອາຊີຕາເວັນອອກສຽງເໜືອ, ອາຊີກາງແລະອື່ນໆ.