ທ່ານສີຈິ້ນຜິງ ປະທານປະເທດຈີນ ໄດ້ພົບປະກັບທ່ານບາຣັກ ໂອບາມາ ປະທານາທິບໍດີອາເມລິກາຢູ່ນະຄອນຫຼວງລີມາ ປະເທດເປຣູ ໃນວັນທີ 19 ພະຈິກນີ້ ໂດຍປະມຸກລັດສອງປະເທດໄດ້ທົບທວນຄືນ ແລະ ສະຫຼຸບບົດຮຽນການພັດທະນາສາຍພົວພັນລະຫວ່າງຈີນ-ອາເມລິກາໃນໄລຍະກວ່າ 3 ປີຜ່ານມາ ແລະເປັນເອກະສັນກັນເຫັນດີຈະຮັບປະກັນໃຫ້ສາຍພົວພົນລະຫວ່າງສອງປະເທດສືບຕໍ່ພັດທະນາໄປຕາມເສັ້ນທາງທີ່ຖືກຕ້ອງ ປອດໃສແລະໝັ້ນທ່ຽງ.
ທ່ານສີຈິ້ນຜິງ ຊີ້ອອກວ່າ: ບົດຮຽນການພັດທະນາສາຍພົວພັນລະຫວ່າງຈີນ-ອາເມລິກາ ກວ່າ 3 ປີຜ່ານມາ ສາມາດສະຫຼຸບໄດ້ ຄື: ໜຶ່ງ, ຕ້ອງກຳທິດທາງໃຫຍ່ຂອງການພັດທະນາສາຍພົວພັນລະຫວ່າງສອງປະເທດໃຫ້ໄດ້ ໂດຍການຮ່ວມມືແມ່ນການເລືອກທີ່ຖືກຕ້ອງພຽງໜຶ່ງດຽວຂອງສອງຝ່າຍ. ສອງ, ຕັ້ງໜ້າຂະຫຍາຍການຮ່ວມມືທີ່ແທ້ຈິງໃຫ້ກວ້າງອອກ, ສະແຫວງຫາການໄດ້ຮັບຜົນປະໂຫຍດຮ່ວມທັງສອງຝ່າຍ ແລະ ຫຼາຍຝ່າຍ, ທັງນີ້ສາມາດສ້າງຄວາມຜາສຸກໃຫ້ແກ່ສອງປະເທດ ແລະກໍສ້າງຜົນປະໂຫຍດໃຫ້ແກ່ທົ່ວໂລກເຊັ່ນດຽວກັນ ແລະສາມ, ຍຶດໝັ້ນການຄວບຄຸມແລະຄຸ້ມຄອງບັນຫາອ່ອນໄຫວຢ່າງມີຄວາມສ້າງສັນ, ເຄົາລົບເຊິ່ງກັນແລະກັນ, ຫຼີກເວັ້ນການວິນິດໄສທີ່ຜິດພາດ, ພິຈາລະນາບັນຫາໃນຖານະຝ່າຍກົງກັນຂ້າມໃຫ້ຫຼາຍຂຶ້ນ ແລະ ປ້ອງກັນບໍ່ໃຫ້ຄວາມຂັດແຍ້ງຮຸນແຮງຂຶ້ນ.
ທ່ານໂອບາມາ ກ່າວວ່າ: ອາເມລິກາແລະຈີນຮ່ວມມືກັນຮັບມືກັບສິ່ງທ້າທາຍ ທັງສາມາດຄວບຄຸມແລະຄຸ້ມຄອງຄວາມຂັດແຍ້ງກັນຢ່າງມີປະສິດທິຜົນ, ກົນໄກປຶກສາຫາລືແລະການຮ່ວມມືທີ່ກ່ຽວຂ້ອງກໍມີປະສິດທິພາບ. ແນວໃດກໍດີ, ຂ້າພະເຈົ້າໄດ້ສະເໜີຄວາມສຳຄັນຂອງການພົວພັນລະຫວ່າງອາເມລິກາ-ຈີນໃຫ້ທ່ານໂດນັນ ທຣັມ ໄດ້ຊາບ ແລະ ເນັ້ນຄວນໃຫ້ສາຍພົວພັນລະຫວ່າງສອງປະເທດບັນລຸການຂ້າມຜ່ານຢ່າງໝັ້ນທ່ຽງ. ຂະນະທີ່ອາເມລິກາຍິນດີພັດທະນາສາຍພົວພັນສອງຝ່າຍກັບຈີນໃຫ້ໄດ້ຢ່າງດົນນານແລະມີປະສິດທິຜົນຍິ່ງຂຶ້ນ.
ນອກນີ້, ສອງຝ່າຍຍັງໄດ້ແລກປ່ຽນຄວາມຄິດຄວາມເຫັນຢ່າງເລິກເຊິ່ງກ່ຽວກັບບັນຫາສາກົນແລະພາກພື້ນທີ່ສຳຄັນແລະສົນໃຈຮ່ວມກັນ.
