ໃນໂອກາດເຂົ້າຮ່ວມກອງປະຊຸມບໍ່ເປັນທາງການຂອງຜູ້ນຳອົງການຮ່ວມມືເສດຖະກິດອາຊີປາຊິຟິກ ຫຼື ອາເປັກ ຄັ້ງທີ 24 ທີ່ຈັດຂຶ້ນຢູ່ນະຄອນຫຼວງລີມາປະເທດເປຣູໃນວັນທີ 20 ພະຈິກນີ້, ທ່ານ ສິຈິ້ນຜິງ ປະທານປະເທດຈີນໄດ້ກ່າວປາໄສວ່າ: "ຫັນໜ້າໄປສູ່ອະນາຄົດ ບຸກບືນກ້າວໜ້າ ເພື່ອສົ່ງເສີມການພັດທະນາແລະຄວາມຈະເລີນຮຸ່ງເຮືອງຂອງອາຊີປາຊິຟິກ".
ທ່ານ ສິຈິ້ນຜິງ ເນັ້ນວ່າ: ໃນ 25 ປີທີ່ຈີນເຂົ້າເປັນສະມາຊິກອົງການອາເປັກຜ່ານມານັ້ນກໍໄດ້ຍຶດໝັ້ນແລະຖືອາຊີປາຊິຟິກເປັນທິດທາງບູລິມະສິດໃນການເປີດປະຕູແລະໃນໂອກາດອີກບໍ່ເທົ່າໃດປີຂ້າງໜ້າກໍຈະຮອດກຳນົດການບັນລຸເປົ້າໝາຍໂບໂກປີ 2020, ພວກເຮົາຄວນເລັ່ງວາງວິໄສທັດການຮ່ວມມືທີ່ກວ້າງໄກກວ່າເກົ່າ ໂດຍຈີນຍິນດີພະຍາຍາມຮ່ວມກັບຝ່າຍຕ່າງໆຖືເອົາການພັດທະນາເປັນຫົວຂໍ້ຕົ້ນຕໍ ທັງເປີດກວ້າງການເປີດປະຕູ, ຊຸກຍູ້ການເຊື່ອມຈອດກັນຂອງເສດຖະກິດກໍຄືການເຊື່ອມໂຍງເຂົ້າກັນຂອງພາກພື້ນ ເພື່ອຮ່ວມກັນວາງແຜນການຮ່ວມມືທີ່ຍິ່ງໃຫຍ່ຂອງອາຊີປາຊິຟິກ.
ກອງປະຊຸມດັ່ງກ່າວໄດ້ອອກ "ຖະແຫຼງການກອງປະຊຸມບໍ່ເປັນທາງການຂອງຜູ້ນຳອາເປັກຄັ້ງທີ 24". ຂະນະທີ່ຕອນເຊົ້າມື້ດັ່ງກ່າວ, ທ່ານ ສິຈິ້ນຜິງ ແລະຜູ້ນຳປະເທດສະມາຊິກອາເປັກຍັງໄດ້ເຂົ້າຮ່ວມປຶກສາຫາລືທ່ວງທ່າເສດຖະກິດທົ່ວໂລກບໍ່ເປັນທາງການ ໂດຍທ່ານນາງ ຄຣິສຕິນ ລາກາດ ຜູ້ອຳນວຍການໃຫຍ່ອົງການກອງທຶນເງິນຕາສາກົນ ຫຼື IMF ໄດ້ເນັ້ນໃຫ້ເຫັນເຖິງສະພາບເສດຖະກິດໂລກ, ຂະນະທີ່ປະທານປະເທດຈີນໄດ້ປະກອບຄຳເຫັນຈຸດຢືນຂອງຕົນຕໍ່ເສດຖະກິດໂລກ.
 |
