ທ່ານ ສິຈິ້ນຜິງ ປະທານປະເທດຈີນໄດ້ກ່າວປາໄສໃນໂອກາດເຂົ້າຮ່ວມພິທີໄຂກອງປະຊຸມສຸດຍອດສື່ມວນຊົນຈີນ-ອາເມລິກາລາຕິນທີ່ຈັດຂຶ້ນຢູ່ສຳນັກງານໃຫຍ່ຄະນະກຳມະ ການເສດຖະກິດອາເມລິກາລາຕິນ-ກາຣາອິບຂອງອົງການສະຫະປະຊາຊາດຢູ່ນະຄອນຊານເຕຍໂກໃນວັນທີ 22 ພະຈິກນີ້ ໂດຍເນັ້ນ "ສ້າງສະພາບແວດລ້ອມໃໝ່ໃນການຮ່ວມມືລະຫວ່າງສື່ມວນຊົນຈີນ-ອາເມລິກາລາຕີນ".
ທ່ານ ສິຈິ້ນຜິງ ເນັ້ນວ່າ: ການຈັດກອງປະຊຸມສຸດຍອດສື່ມວນຊົນຈີນ-ອາເມລິກາລາຕິນຄັ້ງທຳອິດຢ່າງເປັນທາງການນັ້ນ ເປັນການປະດິດສ້າງອັນຍິ່ງໃຫຍ່ໃນປະຫວັດສາດການພົວພັນລະຫວ່າງສື່ມວນຊົນສອງຝ່າຍຂະນະດຽວກັນກໍເປັນມະຫະກຳອີກດ້ວຍເຊິ່ງໃນການລົງເລິກການຮ່ວມມືລະຫວ່າງສື່ມວນຊົນສອງຝ່າຍນັ້ນໃຫ້ຖືສຳຄັນຂໍ້ສະເໜີ 3 ປະການຄື: 1. ອາໄສເຊິ່ງກັນແລະກັນເພື່ອຮ່ວມກັນຍົກລະດັບອິດທິພົນຂອງສື່ມວນຊົນສອງຝ່າຍ; 2. ມີອຸດົມການເດັດດ່ຽວໜຽວແໜ້ນເພື່ອຮ່ວມກັນຊຸກຍູ້ການຮ່ວມມືທີ່ແທ້ຈິງລະຫວ່າງສື່ມວນຊົນສອງຝ່າຍໃຫ້ບັນລຸການພັດທະນາໃໝ່ ແລະ 3. ຖອດຖອນບົດຮຽນເຊິ່ງກັນແລະກັນເພື່ອຊຸກຍູ້ການແລກປ່ຽນຮ່ວມມືລະຫວ່າງສື່ມວນຊົນສອງຝ່າຍໃຫ້ກ້າວຂຶ້ນສູ່ລະດັບໃໝ່. ແນວໃດກໍດີເພື່ອບັນລຸເປົ້າໝາຍດັ່ງກ່າວ, ຈີນຈະສ້າງຕັ້ງສູນແລກປ່ຽນຂ່າວສານຈີນ-ອາເມລິກາລາຕິນໂດຍຈະເຊີນນັກຂ່າວຂອງສື່ມວນຊົນອາເມລິກາລາຕິນຈຳນວນໜຶ່ງມາເຮັດວຽກຫຼືສຶກສາຢູ່ຈີນ.
ທ່ານ ສິຈິ້ນຜິງ ຊີ້ໃຫ້ເຫັນວ່າ: ຄະນະກຳມະການເສດຖະກິດອາເມລິກາລາຕິນ-ກາຣາອິບຂອງອົງການສະຫະປະຊາຊາດໄດ້ເສີມຂະຫຍາຍບົດບາດສຳຄັນໃນການສົ່ງເສີມການຮ່ວມມືລະຫວ່າງຈີນ-ອາເມລິກາລາຕິນ ແລະຫວັງວ່າຄະນະກຳມະການດັ່ງກ່າວຈະຊຸກຍູ້ການເຊື່ອມຕໍ່ຍຸດທະສາດການພັດທະນາຂອງສອງຝ່າຍເພື່ອປະກອບສ່ວນໃໝ່ເຂົ້າໃນການພັດທະນາສາຍພົວພັນລະຫວ່າງຈີນ-ອາເມລິກາລາຕິນ.
 |
