ທ່ານຟີແດນ ກາສໂຕຣ ຜູ້ນຳການປະຕິວັດກູບາໄດ້ເຖິງແກ່ມໍລະນະກຳໃນຄືນວັນທີ 25 ພະຈິກນີ້ ລວມອາຍຸ 90 ປີ. ວັນທີ 26 ພະຈິກນີ້, ຜູ້ນຳຫຼາຍປະເທດໄດ້ສະແດງຄວາມໂສກເສົ້າເສຍໃຈຕໍ່ການເຖິງແກ່ມໍລະນະກຳຂອງທ່ານກາສໂຕຣ ທັງຂໍແບ່ງເບົາຄວາມທຸກໂສກຢ່າງສຸດຊຶ້ງນຳລັດຖະບານແລະປະຊາຊົນກູບາ.
ວັນທີ 26 ພະຈິກນີ້, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນໄດ້ສົ່ງສານສະແດງຄວາມໄວ້ອາໄລໄປຍັງທ່ານຣາອຸນ ກາສໂຕຣ ເລຂາທິການທີໜຶ່ງຂອງຄະນະກຳມະການສູນກາງພັກກອມມູນິດກູບາ, ປະທານຄະນະກຳມະການວຽກງານແຫ່ງລັດທັງເປັນປະທານສະພາລັດຖະມົນຕີກູບາໂດຍຕາງໜ້າໃຫ້ພັກ-ລັດ,ປະຊາຊົນຈີນແລະໃນນາມສ່ວນຕົວສະແດງຄວາມໂສກເສົ້າເສຍໃຈຢ່າງສຸດຊຶ້ງຕໍ່ການເຖິງແກ່ມໍລະນະກຳຂອງທ່ານຟີແດນ ກາສໂຕຣ ທັງຂໍແບ່ງເບົາຄວາມທຸກໂສກຢ່າງຈິງໃຈທີ່ສຸດນຳຄອບຄົວທ່ານຟີແດນກາສໂຕຣ.
ວັນດຽວກັນ, ທ່ານຫຼີ້ເຄີ້ສຽງ ນາຍົກລັດຖະມົນຕີຈີນກໍໄດ້ສົ່ງສານສະແດງຄວາມໄວ້ອາໄລໄປຍັງທ່ານຣາອຸນ ກາສໂຕຣເຊັ່ນດຽວກັນໂດຍຕ້າງໜ້າໃຫ້ລັດຖະບານ, ປະຊາຊົນຈີນແລະໃນນາມສ່ວນຕົວສະແດງຄວາມໄວ້ອາໄລຢ່າງສຸດຊຶ້ງທີ່ສຸດຕໍ່ການເຖິງແກ່ມໍລະນະກຳຂອງສະຫາຍຟີແດນກາສໂຕຣ ທັງຂໍແບ່ງເບົາຄວາມທຸກໂສກຢ່າງສຸດຊຶ້ງນຳລັດຖະບານແລະປະຊາຊົນກູບາພ້ອມດ້ວຍຄອບຄົວສະຫາຍກາສໂຕຣ.
ວັນທີ 26 ພະຈິກນີ້, ທ່ານວຣາດີເມຍ ປູຕິນ ປະທານາທິບໍດີຣັດເຊຍໄດ້ກ່າວສະແດງຄວາມໄວ້ອາໄລຕໍ່ການເຖິງແກ່ມໍລະນະກຳຂອງທ່ານຟີແດນ ກາສໂຕຣ ຂະນະທີ່ທຳນຽບຂາວອາເມລິກາກໍໄດ້ອອກຖະແຫຼງການເຊັ່ນດຽວກັນເພື່ອຂໍແບ່ງເບົາຄວາມທຸກໂສກນຳຄອບຄົວທ່ານກາສໂຕຣທັງຢືນຢັນວ່າ ປະຫວັດສາດຈະບັນທຶກແລະຕີລາຄາຕໍ່ທ່ານກາສໂຕຣທີ່ສົ່ງຜົນສະທ້ອນຢ່າງໃຫຍ່ຫຼວງຕໍ່ປະຊາຊົນກູບາກໍຄືທົ່ວໂລກ.
 |
