ແຫຼ່ງຂ່າວຈາກທະນາຄານອຸດສາຫະກຳ-ການຄ້າຈີນ ຫຼື ICBC ໃຫ້ຮູ້ວ່າ: ພາຍຫຼັງ ICBC ສາຂານະຄອນຫຼວງວຽງຈັນໄດ້ສ້າງຕັ້ງຂຶ້ນແລະເລີ່ມດຳເນີນທຸລະກິດຢ່າງເປັນທາງການໃນທ້າຍເດືອນພະຈິກປີ 2011 ແລະມາຮອດປັດຈຸບັນການດຳເນີນທຸລະກິດໄດ້ 5 ປີພໍດີ. ຂະນະທີ່ແຕ່ປີ 2013-2015, ມີຍອດຊັບສິນເປັນອັນດັບ 1 ໃນບັນດາທະນາຄານຕ່າງປະເທດແລະເປັນອັນດັບ 2 ໃນທົ່ວຂະແໜງການການຄ້າ 3 ປີຕິດຕໍ່ກັນ. ທັງນີ້ທະນາຄານສປປລາວເປີດເຜີຍວ່າ: ມາຮອດທ້າຍເດືອນມິຖຸນາຜ່ານມາ, ICBC ສາຂານະຄອນຫຼວງວຽງຈັນມີຍອດຊັບສິນຫຼາຍກວ່າທະນາຄານການຄ້າຕ່າງປະເທດລາວແລະກາຍເປັນທະນາຄານການຄ້າທີ່ມີຍອດຊັບສິນຫຼາຍກວ່າໝູ່ຢູ່ລາວ ເຊິ່ງຖືວ່າເປັນເທື່ອທຳອິດໃນປະຫວັດສາດການເງິນຂອງປະເທດດ່ັງກ່າວ.
ເຈົ້າໜ້າທີ່ ICBC ສາຂານະຄອນຫຼວງວຽງຈັນໃຫ້ສຳພາດວ່າ: ລາວຕັ້ງຢູ່ໃຈກາງແຫຼມອິນດູຈີນແລະຢູ່ລຽບຕາມ "ໜຶ່ງແລວທາງໜຶ່ງເສັ້ນທາງ" ເຊິ່ງມີທ່າແຮງຫຼາຍດ້ານໂດຍສະເພາະດ້ານທີ່ຕັ້ງໃນການເຊື່ອມຕໍ່ກັບບັນດາປະເທດອ້ອມຂ້າງໃນພາກພື້ນ. ຂະນະທີ່ລັດຖະບານລາວໄດ້ວາງນະໂຍບາຍ "ຫັນປະເທດທີ່ບໍ່ມີຊາຍແດນຕິດກັບທະເລເປັນປະເທດໃຈກາງບໍລິການທາງຜ່ານ", "ສ້າງປະເທດຕົນກາຍເປັນໝໍ້ໄຟຂອງອາຊີຕາເວັນອອກສຽງໃຕ້" ແລະອື່ນໆນັ້ນ ຈຶ່ງແທດເໝາະກັບຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງຈີນສູງທີ່ສຸດ. ທີ່ສຳຄັນພາຍຫຼັງລາວເລັ່ງຊຸກຍູ້ນະໂຍບາຍປະຕິຮູບແລະເປີດປະຕູ ສົ່ງຜົນເຮັດໃຫ້ເສດຖະກິດ-ສັງຄົມຂອງປະເທດດ່ັງກ່າວໄດ້ຮັບການປະຕິຮູບຢ່າງເລິກເຊິ່ງ, ຂະນະທີ່ທະນາຄານຕົນຈະສືບຕໍ່ຊຸກຍູ້ຍຸດ ທະສາດການດຳເນີນທຸລະກິດຢູ່ລາວໃຫ້ເຂົ້າສູ່ລວງເລິກ ເພື່ອເສີມຂະຫຍາຍບົດບາດເປັນຂົວຕໍ່ໃນການແລກປ່ຽນແລະຮ່ວມມືລະຫວ່າງສອງປະເທດໃຫ້ດີກວ່າເກົ່າ ແລະຊ່ວຍພັດທະນາເສດຖະກິດຂອງປະເທດດັ່ງກ່າວໃຫ້ເຕີບໂຕຢ່າງວ່ອງໄວ.