ທ່ານ ທອງລຸນ ສິສຸລິດ ນາຍົກລັດຖະມົນຕີ ສປປ ລາວພ້ອມດ້ວຍຄະນະໄດ້ ຢ້ຽມຢາມແຂວງຫູນານ ສປ ຈີນໃນວັນທີ 29-30 ພະຈິກຜ່ານມາ ໂດຍທ່ານ ຕູ້ເຈ່ຍຫາວ ເລຂາພັກແຂວງຫູນານໄດ້ເຂົ້າຢ້ຽມຄຳນັບທ່ານ ທອງລຸນ ພ້ອມຄະນະ, ຂະນະທີ່ທ່ານ ສູຕາເຈີ ຮອງເລຂາພັກແຂວງ, ຮັກສາການເຈົ້າແຂວງຮ່ວມຕິດຕາມຄະນະ.
ໃນໂອກາດຢ້ຽມຢາມເຂດເມືອງໃໝ່ຊ່ຽງຈ່ຽງ, ທ່ານ ທອງລຸນ ສິສຸລິດ ກ່າວວ່າ: ຫຼັງຈາກ 15 ປີ, ຕົນໄດ້ມາຢ້ຽມຢາມແຂວງຫູນານອີກເທື່ອໜຶ່ງແລະໄດ້ເຫັນຜົນສຳເລັດໃນການພັດທະນາເສດຖະກິດ-ສັງຄົມຂອງແຂວງດັ່ງກ່າວຢ່າງໃຫຍ່ຫຼວງ, ເຊິ່ງປະເທດຕົນສາມາດຊອກຫາທ່າແຮງການພັດທະນາເຫຼົ່ານີ້ໂດຍສະເພາະບົດຮຽນການສ້າງເຂດເມືອງໃໝ່ຊ່ຽງຈ່ຽງ. ແນວໃດກໍດີ, ປະເທດຕົນພ້ອມຈະຊຸກຍູ້ການແລກປ່ຽນແລະຮ່ວມມືໃນຂົງເຂດຕ່າງໆລະຫວ່າງສອງຝ່າຍໃຫ້ໄດ້ຮັບຄວາມຄືບໜ້າໃໝ່ຢ່າງບໍ່ຢຸດຢັ້ງພາຍໃຕ້ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ".
ໂອກາດເຂົ້າຢ້ຽມຄຳນັບທ່ານ ທອງລຸນ ສີສຸລິດ, ທ່ານ ຕູ້ເຈ່ຍຫາວ ຕາງໜ້າຄະນະພັກແລະອົງການປົກຄອງແຂວງຫູນານໄດ້ກ່າວວ່າ: ຈີນ-ລາວເປັນປະເທດເພື່ອນມິດທີ່ໃກ້ຄຽງ, ຈາກສາຍພົວພັນລະຫວ່າງສອງປະເທດນັບມື້ກ້າວເຂົ້າສູ່ລວງເລິກ, ແຂວງຕົນຈະເລັ່ງປະຕິບັດຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ", ເປີດກວ້າງການຮ່ວມມືທີ່ແທ້ຈິງໃນຂົງເຂດຕ່າງໆລະຫວ່າງສອງຝ່າຍເປັນຕົ້ນເສດຖະກິດ-ການຄ້າ, ວັດທະນະທຳ, ການທ່ອງທ່ຽວ, ກະສິກຳແລະອື່ນໆ ທັງນີ້ຈະສົ່ງເສີມວິສາຫະກິດທີ່ມີທ່າແຮງຂອງແຂວງຕົນໄປລົງທຶນຢູ່ລາວໃຫ້ຫຼາຍກວ່າເກົ່າ ເພື່ອບັນລຸເປົ້າໝາຍການພັດທະນາຮ່ວມກັນແລະຕ່າງຝ່າຍຕ່າງມີຜົນປະໂຫຍດ.
 |
