ຫຼັງສະພາຄວາມໝັ້ນຄົງອົງການສະຫະປະຊາຊາດຮັບຮອງເອົາມະຕິໃໝ່ຕໍ່ ສປປ ເກົາຫຼີ ໃນວັນທີ 30 ພະຈິກຜ່ານມາ, ກະຊວງການເງິນອາເມລິກາກໍໄດ້ປະກາດໃນວັນທີ 2 ທັນວານີ້ວ່າ ຈະຂວ້ຳບາດ 7 ຄົນ ແລະ 16 ບໍລິສັດທີ່ມີສ່ວນກ່ຽວຂ້ອງກັບ ສປປ ເກົາຫຼີ.
ໃນ 7 ຄົນທີ່ຖືກຂວ້ຳບາດດັ່ງກ່າວ ລວມມີເຈົ້າໜ້າທີ່ຜູ້ໜຶ່ງຂອງກະຊວງອຸດສາຫະກຳພະລັງງານປະລະມານູ ສປປ ເກົາຫຼີ, ຮອງປະທານຄະນະກຳມະການເສດຖະກິດທີ 2 ທີ່ສັງກັດກະຊວງອຸດສາຫະກຳຍຸດທະພັນ ສປປ ເກົາຫຼີ, ເຈົ້າໜ້າທີ່ 3 ທ່ານຂອງພັກແຮງງານເກົາຫຼີ, ປະທານບໍລິສັດການຄ້າກຳຊັນ ເຊິ່ງເປັນບໍລິສັດໃນຂະແໜງການພະລັງງານແລະຫຼອມໂລຫະເກົາຫຼີ ພ້ອມດ້ວຍພະນັກງານຜູ້ໜຶ່ງຂອງບໍລິສັດການພັດທະນາການຄ້າອຸດສາຫະກຳບໍ່ແຮ່ເກົາຫຼີ.
ໃນ 16 ບໍລິສັດທີ່ຖືກຂວ້ຳບາດເທື່ອນີ້ ໄດ້ເພີ່ມຕື່ມບໍລິສັດການບິນຄໍໂຢພ້ອມທັງເຮືອບິນ 16 ລຳທີ່ມີສ່ວນກ່ຽວຂ້ອງກັບບໍລິສັດດັ່ງກ່າວ; ບໍລິສັດສຳຫຼວດນ້ຳມັນເຊື້ອໄຟເກົາຫຼີ; ບໍລິສັດການຄ້າໃນຂະແໜງການພະລັງງານແລະອຸດສາຫະກຳບໍ່ແຮ່ເກົາຫຼີ; ສະຖາບັນການເງິນ 6 ແຫ່ງ ເປັນຕົ້ນ ທະນາຄານຄໍໂຢ, ທະນາຄານອາຊີຕາເວັນອອກສຽງເໜືອ, ບໍລິສັດປະກັນໄພແຫ່ງຊາດເກົາຫຼີ; 4 ບໍລິສັດ ເປັນຕົ້ນ ບໍລິສັດພັດທະນາຕ່າງປະເທດມານຊູແດ ທີ່ຖືກເຫັນວ່າສວຍໃຊ້ການສົ່ງອອກແຮງງານເກົາຫຼເໜືອເພື່ອສ້າງລາຍຮັບເປັນເງິນຕາຕ່າງປະເທດໃຫ້ປະເທດຕົນ; ບໍລິສັດການຄ້າອີກ 2 ແຫ່ງທີ່ຖືກເຫັນວ່າຜ່ານຊ່ອງທາງຕ່າງໆເພື່ອຜະລິດ, ນຳເຂົ້າ-ສົ່ງອອກແຮ່ທາດ, ກຣາຟິດ, ຖ່ານຫີນ ພ້ອມດ້ວຍອຸປະກອນຊອຟແວທີ່ກ່ຽວຂ້ອງ ແລະສ້າງລາຍຮັບເປັນເງິນຕາຕ່າງປະເທດໃຫ້ ສປປ ເກົາຫຼີ.
