ໃນພິທີຖະແຫຼງຂ່າວທີ່ຈັດຂຶ້ນໃນວັນທີ 7 ທັນວານີ້, ທ່ານລູ້ຄ່າງ ໂຄສົກກະຊວງການຕ່າງປະເທດຈີນກ່າວວ່າ, ຈີນແລະຍີ່ປຸ່ນຈະປຶກສາຫາລືໃນລະດັບສູງກ່ຽວກັບວຽກງານທາງທະເລຮອບທີ 6.
ທ່ານລູ້ຄ່າງ ກ່າວວ່າ, ຫຼັງການປຶກສາຫາລື, ສອງຝ່າຍໄດ້ຕົກລົງຈະປຶກສາຫາລືໃນລະດັບສູງກ່ຽວກັບວຽກງານທາງທະເລຮອບທີ 6 ຢູ່ເມືອງໄຫໂຄວແຂວງໄຫຫຼຳ ສປ ຈີນໃນວັນທີ 7 ຫາວັນທີ 9 ທັນວານີ້, ໂດຍມີເຈົ້າໜ້າທີ່ການຕ່າງປະເທດ, ການປ້ອງກັນປະເທດ, ການປະຕິບັດກົດໝາຍທາງທະເລແລະພາກສ່ວນວຽກງານຄຸ້ມຄອງທາງທະເລຂອງສອງປະເທດເຂົ້າຮ່ວມ.
ທ່ານລູ້ຄ່າງອະທິບາຍວ່າ, ກົນໄກປຶກສາຫາລືລະດັບສູງກ່ຽວກັບວຽກງານທາງທະເລລະຫວ່າງຈີນ-ຍີ່ປຸ່ນແມ່ນກົນໄກການປະສານສົມທົບສັງລວມກ່ຽວກັບວຽກງານທາງທະເລລະຫວ່າງສອງປະເທດ, ແລະຈີນກໍຍິນດີແລກປ່ຽນຄວາມເຫັນຢ່າງເລິກເຊິ່ງກ່ຽວກັບບັນຫາທະເລທີ່ສອງຝ່າຍສົນໃຈຮ່ວມກັນໂດຍໃນການປຶກສາຫາລືເທື່ອນີ້, ກໍເພື່ອເພີ່ມຄວາມໄວ້ເນື້ອເຊື່ອໃຈກັນໃຫ້ຫຼາຍຂຶ້ນ.