ສານສູງສຸດອັງກິດໄດ້ສຳເລັດການພິຈາລະນາຄະດີກ່ຽວກັບລະບຽບການຖອນອອກຈາກສະຫະພາບເອີຣົບຂອງປະເທດດັ່ງກ່າວໃນວັນທີ 8 ທັນວານີ້ ພາຍຫຼັງດຳເນີນມາ 4 ວັນ, ຂະນະທີ່ທ່ານລອດ ນິວເບີເກີ ປະທານສານສູງສຸດອັງກິດ ກ່າວວ່າ: ສານສູງສຸດຈະຕັດສິນໃຫ້ໄວເທົ່າທີ່ຈະໄວໄດ້. ແນວໃດກໍດີ, ຈຸດສຳຄັນໃນຄະດີນີ້ກໍເພື່ອຮັບປະກັນໃຫ້ຂັ້ນຕອນການຖອນອອກຈາກສະຫະພາບເອີຣົບຂອງອັງກິດດຳເນີນໄປຢ່າງຖືກຕ້ອງຕາມກົດໝາຍ, ຫາກບໍ່ແມ່ນຍົກເລີກຜົນການເອົາປະຊາມະຕິ.
ເດືອນຜ່ານມາ, ສານສູງສຸດອັງກິດໄດ້ຕັດສິນວ່າ ກ່ອນທີ່ລັດຖະບານປະເທດຕົນເລີ່ມປະຕິບັດລະບຽບການຖອນອອກຈາກສະຫະພາບເອີຣົບຢ່າງເປັນທາງການນັ້ນ ຕ້ອງຂໍການອະນຸມັດຈາກລັດຖະສະພາກ່ອນ. ແຕ່ລັດຖະບານພັດເຫັນວ່າ, ປະຊາຊົນໄດ້ມອບສິດໃຫ້ດຳເນີນການຖອນອອກຈາກສະຫະພາບເອີຣົບ ໂດຍຜ່ານການລົງປະຊາມະຕິ, ສະນັ້ນ ລັດຖະບານບໍ່ຈຳເປັນຕ້ອງຜ່ານການມອບສິດຈາກລັດຖະສະພາອີກ. ແນວໃດກໍດີ, ລັດຖະບານອັງກິດບໍ່ຍອມຮັບຜົນຕັດສິນດັ່ງກ່າວ ຈຶ່ງຮ້ອງຟ້ອງຕໍ່ສານສູງສຸດ ແລະຜົນການຕັດສິນກໍຈະຕົກລົງວ່າ ຈະແມ່ນລັດຖະບານ ຫຼື ລັດຖະສະພາ ເປັນຜູ້ນຳພາປະເທດຕົນຖອນອອກຈາກສະຫະພາບເອີຣົບ ທັງນີ້ຈະມີຜົນສະທ້ອນໃຫຍ່ທີ່ສຸດຕໍ່ຂັ້ນຕອນດັ່ງກ່າວ.