ລັດຖະສະພາ ສ.ເກົາຫຼີ ໄດ້ຮັບຮອງຍັດຕິຖອດຖອນປະທານາທິບໍດີ ປັກກຸນເຮ ອອກຈາກຕຳແໜ່ງ ດ້ວຍ 234 ສຽງເຫັນດີ ແລະ 56 ສຽງຄັດຄ້ານ ໃນຕອນບ່າຍວັນທີ 9 ທັນວານີ້.
ທັງນີ້, ສື່ມວນຊົນ ສ.ເກົາຫຼີ ລາຍງານວ່າ, ໃນຮ່າງຍັດຕິດັ່ງກ່າວ ໄດ້ກ່າວເຖິງຫຼາຍຂໍ້ຄວາມ ເຊັ່ນ ນາງຊອຍຊຸນຊິວ ຄົນໃກ້ຊິດຂອງທ່ານນາງປັກກຸນເຮເຂົ້າແຊກແຊຽງວຽກງານການບໍລິຫານປະເທດ, ການປະພຶດຂອງລັດຖະບານໃນການຮັບມືກັບເຫດການເຮືອ "ເຊວອນ" ຫຼົ້ມ ແລະ ນາງຊອຍຊຸນຊິວ ຖືກສົງໄສບັງຄັບໃຫ້ວິສາຫະກິດຂະໜາດໃຫຍ່ບໍລິຈາກເງິນໃຫ້ແກ່ມູນນິທິທີ່ຕົນເອງຄວບຄຸມ ທັງກ່າວຫາທ່ານນາງປັກກຸນເຮ ປະພຶດທີ່ລະເມີດລັດຖະທຳມະນູນແລະກົດໝາຍໃນໄລຍະດຳລົງຕຳແໜ່ງປະທານາທິບໍດີ.
ຕາມລະບຽບການ, ຫຼັງລັດຖະສະພາຮັບຮອງຮ່າງຍັດຕິຖອດຖອນປະທານາທິບໍດີແລ້ວ ກໍຈະຍື່ນໃຫ້ສານລັດຖະທຳມະນູນພິຈາລະນາ ແລະ ໃນໄລຍະພິຈາລະນານີ້ຈະໃຊ້ເວລາດົນສຸດເຖິງ 6 ເດືອນ. ຂະນະທີ່ທ່ານນາງປັກກຸນເຮ ຈະຖືກງົດໃຊ້ອຳນາດປະທານາທິບໍດີ ແລະໃຫ້ນາຍົກລັດຖະມົນຕີໃຊ້ອຳນາດແທນ.
