ທ່ານແສງນວນ ໄຊຍະລາດ ຮອງປະທານສະພາແຫ່ງຊາດລາວ ໄດ້ເດີນທາງຢ້ຽມຢາມໂຮງງານຜະລິດຢາງນ້ຳທາຂອງບໍລິສັດລົງທຶນຢຸນຊ້ຽງຈຳກັດທີ່ຂຶ້ນກັບກຸ່ມບໍລິສັດບຸກເບີກກະສິກຳແຂວງຢຸນນານ ສປ ຈີນ ໂດຍມີທ່ານໄຊພອນ ຄຸນສີລິເຮືອງ ຮອງເລຂາພັກແຂວງຫຼວງນ້ຳທາ ແລະພາກສ່ວນກ່ຽວຂ້ອງຮ່ວມເດີນທາງ ໃນວັນທີ 8 ທັນວານີ້.
ທ່ານ ນາງ ເສີນສຸ້ຍຢິ່ງ ຜູ້ອຳນວຍການໃຫຍ່ບໍລິສັດລົງທຶນຢຸນຊ້ຽງຈຳກັດ ໄດ້ແຈ້ງສະພາບຕ່າງໆຂອງບໍລິສັດຕົນໃຫ້ທ່ານແສງນວນ ໄຊຍະລາດ ຊາບ ເປັນຕົ້ນ ສະພາບການລົງທຶນຢູ່ລາວຂອງກຸ່ມບໍລິສັດບຸກເບີກກະສິກຳຢຸນນານ, ໝາກຜົນທີ່ໄດ້ຮັບໃນໂຄງການປູກພືດທົດແທນຝິ່ນ ທັງໄດ້ຕັ້ງໜ້າປະກອບສ່ວນເຂົ້າໃນສັງຄົມ, ແຜນຍຸດທະສາດຂອງກຸ່ມບໍລິສັດຕົນພ້ອມຄວາມຄືບໜ້າໃນປັດຈຸບັນ ລວມທັງການສຸມໃສ່ອະນຸລັກສິ່ງແວດລ້ອມຂອງໂຮງງານຜະລິດຢາງ.
ທ່ານແສງນວນ ໄຊຍະລາດ ໄດ້ຕາງໜ້າລັດຖະບານ ແລະ ປະຊາຊົນລາວຂອບໃຈ ບໍລິສັດລົງທຶນຢຸນຊ້ຽງຈຳກັດທີ່ໄດ້ປະກອບສ່ວນສຳຄັນແລະຕໍ່ເນື່ອງເພື່ອພັດທະນາເສດຖະກິດ-ສັງຄົມລາວ ທັງເນັ້ນວ່າ: ມາດຕະການອະນຸລັກສິ່ງແວດລ້ອມ ແລະ ໂຄງການສາທາລະນະປະໂຫຍດໃນສັງຄົມຂອງບໍລິສັດ ໄດ້ດຳເນີນເປັນຢ່າງດີ, ພວກຂ້າພະເຈົ້າຍິນດີຕ້ອນຮັບວິສາຫະກິດທີ່ມີຄວາມຮັບຜິດຊອບຄືແບບນີ້ມາລົງທຶນຢູ່ປະເທດຕົນ ແລະ ຫວັງວ່າບໍລິສັດລົງທຶນຢຸນຊ້ຽງຈະນຳໃຊ້ທ່າແຮງຂອງກຸ່ມບໍລິສັດບຸກເບີກກະສິກຳຢຸນນານ ແລະເພີ່ມທະວີການຮ່ວມມືກັບກະຊວງກະສິກຳແລະປ່າໄມ້ລາວ ເພື່ອພັດທະນາອຸດສາຫະກຳຢາງພາລາຢູ່ປະເທດລາວໃຫ້ດີຕື່ມອີກ.