ເວັບໄຊການຄ້າເອເລັກໂຕຣນິກຂ້າມຊາດຈີນ-ອາຊຽນຂອງສະມາຄົມສົ່ງເສີມການຄ້າຈີນແລະສະມາຄົມອຸດສາຫະກຳ-ການຄ້າຂອງປະເທດຕ່າງໆໃນອາຊຽນໄດ້ເປີດນຳໃຊ້ຢ່າງເປັນທາງການຢູ່ນະຄອນຫຼວງປັກກິ່ງ ສປ ຈີນໃນວັນທີ 9 ທັນວານີ້.
ທ່ານ ຈ່ຽງເຈິ່ງເຫວີຍ ປະທານສະມາຄົມສົ່ງເສີມການຄ້າຈີນກ່າວໃນພິທີເປີດວ່າ, ປີ 2015, ຈີນບັນລຸມູນຄ່າການສົ່ງອອກ 80 ຕື້ໂດລາສະຫະລັດສູ່ອາຊຽນຈາກການຄ້າເອເລັກໂຕຣນິກຂ້າມຊາດໂດບປັດຈຸບັນ, ຈີນມີຜູ້ໃຊ້ອິນເຕີເນັດກວ່າ 700 ລ້ານຄົນ, ໃນນັ້ນມີຜູ້ຊື້ສິນຄ້າຜ່ານທາງອິນເຕີເນັດກວ່າ 400 ລ້ານຄົນ. ນັບວ່າເປັນຕະຫຼາດການຄ້າເອເລັກໂຕຣນິກທີ່ມີຍອດມູນຄ່າປະມານ 3000 ຕື້ໂດລາສະຫະລັດແລະເຕີບໂຕດ້ວຍຈັງຫວະສູງ. ຂະນະທີ່ອາຊຽນໃນຖານະເປັນພາກພື້ນທີ່ມີຜູ້ໃຊ້ອິນເຕີເນັດເພີ່ມຂຶ້ນໄວກວ່າໝູ່ຂອງໂລກກໍມີຜູ້ໃຊ້ອິນເຕີເນັດກວ່າ 260 ລ້ານຄົນ. ແນວໃດກໍດີ, ຜູ້ບໍລິໂພກທາງອິນເຕີເນັດເປັນຈຳນວນຫຼາຍໄດ້ສ້າງໂອກາດການຄ້າໃຫ້ແກ່ວິສາຫະກິດຈີນ-ປະເທດຕ່າງໆໃນອາຊຽນນັບມື້ຫຼາຍກວ່າເກົ່າ, ສ່ວນການຄ້າເອເລັກໂຕຣນິກຂ້າມຊາດກໍໄດ້ກາຍເປັນທ່າແຮງໃໝ່ໃນການຊຸກຍູ້ການຄ້າສອງຝ່າຍ.
ຂ່າວແຈ້ງວ່າ, ໃນເບື້ອງຕົ້ນ, ເວັບໄຊດັ່ງກ່າວເນັ້ນນຳເຂົ້າສິນຄ້າແລະປັດຈຸບັນໄດ້ເປີດຮ້ານມາເລເຊຍທາງອິນເຕີເນັດແລະມີນັກທຸລະກິດຈາກ 7 ປະເທດເປັນຕົ້ນຫວຽດນາມ, ສິງກະໂປ, ໄທ, ອິນໂດເນເຊຍແລະອື່ນໆນຳເອົາສິນຄ້າຂອງປະເທດຕ່າງໆໃນອາຊຽນມາຂາຍທາງອິນເຕິເນັດເປັນຕົ້ນໝາກໄມ້, ອາຫານ, ອາຫານເສີມສະຂະພາບ, ເຄື່ອງໃຊ້ປະຈຳວັນ, ເຄື່ອງສຳອາງແລະອື່ນໆ.