ຫວ່າງມໍ່ໆນີ້ ໜັງສືພິມ wall street ລາຍວັນຂອງອາເມລິກາພິມບົດຄວາມໂດຍເຫັນວ່າ, ຈີນກຳລັງລົງທຶນກ້ອນໃຫຍ່ເພື່ອຊຸກຍູ້ການປະດິດສ້າງ ໂດຍຫວັງຢາກຟື້ນຟູຖານະປະເທດໃຫຍ່ດ້ານການປະດິດສ້າງຄືນໃໝ່, ແລະຫຼຸດການອາໄສຕ່າງປະເທດໃນດ້ານເຕັກນິກແກນກາງ .
ບົດຄວາມຂຽນວ່າ, ໃນໄລຍະງົບປະມານການຄົ້ນຄວ້າຂອງປະເທດຕາເວັນຕົກບໍ່ພຽງພໍ, ຈີນພັດສະໜອງເງິນທຶນກ້ອນໃຫຍ່ໃຫ້ແກ່ໂຄງການຄົ້ນຄວ້າຊັ້ນຍອດຫຼາຍໂຄງການ. ຕົວເລກສະຖິຕິຂອງອົງການຮ່ວມມືເສດຖະກິດແລະການພັດທະນາສະແດງໃຫ້ເຫັນວ່າ, ລາຍຈ່າຍໃນການຄົ້ນຄວ້າພັດທະນາຂອງຈີນຫຼາຍກວ່າຍີ່ປຸ່ນໃນປີ 2009, ຮອດປີ 2013 ຫຼາຍກວ່າເອີລົບ, ຄາດວ່າຮອດປີ 2020 ຈະຫຼາຍກວ່າອາເມລິກາ.
ບົດຄວາມຊີ້ອອກວ່າ, ວິສາຫະກິດປະດິດສ້າງວິທະຍາສາດເຕັກນິກຂອງຈີນກໍຖືກສົນໃຈຫຼາຍ, ໂດຍວິສາຫະກິດເຫຼົ່ານີ້ກຳລັງດຶງດູດທຶນຮອນແລະຊັບພະຍາກອນມະນຸດຫຼາຍກວ່າເກົ່າ.
ບົດຄວາມຂຽນວ່າ, ພາຍໃຕ້ຂອບ "ສົນທິສັນຍາຮ່ວມມືລິຂະສິດ"ຂອງອົງການສິດຊັບສິນທາງປັນຍາໂລກ, ອັດຕາຮ້ອງຂໍລິຂະສິດຂອງຈີນໃນທົ່ວໂລກໄດ້ເພີ່ມຂຶ້ນເຖິງ 13.7%, ໂດຍຮອງຈາກອາເມລິກາແລະຍີ່ປຸ່ນ ເປັນອັນດັບທີສາມ ດ້ວຍການຮ້ອງຂໍລິຂະສິດ 29846 ໂຄງການ. ສ່ວນໃນ10ປີກ່ອນ, ການຮ້ອງຂໍຂອງຈີນ ໄດ້ກວມອັດຕາທົ່ວໂລກພຽງ 1.8% ເທົ່ານັ້ນ.
 |
