ການເຈລະຈາຮອບທີ 16 ກ່ຽວກັບອະນຸສັນຍາການພົວພັນຄູ່ເສດຖະກິດຮອບດ້ານໃນພາກພື້ນ ຫຼື RCEP ທີ່ດຳເນີນເປັນເວລາ 5 ວັນ ໄດ້ສິ້ນສຸດລົງຢູ່ເມືອງທັງເກຣາງຂອງອິນໂດເນເຊຍໃນວັນທີ 10 ທັນວານີ້, ຜູ້ແທນຂອງ 16 ປະເທດສະມາຊິກ RCEP ໄດ້ສຳເລັດການເຈລະຈາໝວດວິສາຫະກິດຂະໜາດກາງແລະນ້ອຍ, ເຫັນດີຮັກສາທ່ວງທ່າທີ່ດີແຫ່ງການເຈລະຈາ ຂອງ RCEP ໃນປັດຈຸບັນ, ພະຍາຍາມສຳເລັດການເຈລະຈາໃນປີ 2017.
ການເຈລະຈາໝວດວິສາຫະກິດຂະໜາດກາງແລະນ້ອຍ ແມ່ນໝວດທີສອງທີ່ສຳເລັດນັບ ແຕ່ເລີ່ມດຳເນີນການເຈລະຈາ RCEP ເປັນຕົ້ນມາ, ການສຳເລັດການເຈລະຈາໝວດວິສາຫະກິດຂະໜາດກາງແລະນ້ອຍ ຈະເພີ່ມທະວີການຮ່ວມນຳໃຊ້ຂໍ້ມູນແລະຮ່ວມມືກັນລະຫວ່າງປະເທດສະມາຊິກ RCEP , ຍົກສູງຄວາມສາມາດຂອງວິສາຫະກິດຂະໜາດກາງແລະນ້ອຍຂອງ ປະເທດ RCEP, ເພື່ອຊ່ວຍເຫຼືອເຂົາເຈົ້ານຳໃຊ້ໂອກາດທີ່ສ້າງໂດຍ RCEP ນັ້ນຢ່າງເຕັມທີ່.
ນອກນີ້ ໜັງສືພິມຢາກາກຕາໂພສລາຍງານວ່າ, ນອກຈາກມີການເຈລະຈາກ່ຽວກັບໝວດວິສາຫະກິດຂະໜາດກາງແລະນ້ອຍ ການເຈລະຈາກ່ຽວກັບໝວດການຮ່ວມມືດ້ານເສດຖະກິດ ແລະເຕັກໂນໂລຊີແລ້ວ, ການເຈລະຈາກ່ຽວກັບໝວດນະໂຍບາຍການແຂ່ງຂັນກໍໄດ້ຮັບຄວາມຄືບໜ້າທີ່ສຳຄັນແລ້ວ, ການເຈລະຈາກ່ຽວກັບຫົວຂໍ້ຕ່າງໆເຊັ່ນ ການຄ້າສິນຄ້າ ການຄ້າການບໍລິການ ການລົງທຶນ ສິດຊັບສິນທາງປັນຍາ ການເຄື່ອນໄຫວຢ່າງເສລີຂອງກຳມະກອນເຕັກນິກ ແລະອື່ນໆ ກໍກຳລັງດຳເນີນຢູ່.
ການເຈລະຈາ RCEP ເລີ່ມຈັດຂຶ້ນຢ່າງເປັນທາງການໃນເດືອນພະຈິກປີ 2012, ເມື່ອສ້າງສຳເລັດແລ້ວ ຈະກາຍເປັນເຂດການຄ້າເສລີທີ່ມີປະຊາກອນຫຼາຍທີ່ສຸດ, ກວມເນື້ອທີ່ກວ້າງທີ່ສຸດ, ມີສະມາຊິກຫຼາຍເຄົ້າທີ່ສຸດ ແລະການພັດທະນາມີຊີວິດຊີວາທີ່ສຸດໃນໂລກ.