ຕາມຂ່າວສານຊິນຮວາ: ທ່ານ ລິວຢູນຊ່ານ ກຳມະການປະຈຳກົມການເມືອງ, ເລຂາທິການສູນກາງພັກກອມມູນິດຈີນ ໄດ້ພົບປະກັບຄະນະຜູ້ແທນພັກກອມມູນິດຫວຽດນາມທີ່ນຳໂດຍທ່ານ ຟາມມິງຈິງ ກຳມະການກົມການເມືອງ, ເລຂາທິການ, ຫົວໜ້າຄະນະຈັດຕັ້ງສູນກາງພັກກອມມູນິດຫວຽດນາມຢູ່ນະຄອນຫຼວງປັກກິ່ງໃນວັນທີ 12 ທັນວານີ້.
ໂອກາດດັ່ງກ່າວ, ທ່ານ ລິວຢູນຊ່ານ ກ່າວວ່າ, ຈີນແລະຫວຽດນາມແມ່ນປະເທດສັງຄົມນິຍົມເປັນບ້ານໃກ້ເຮືອນຄຽງທີ່ມີມິດຕະພາບຕໍ່ກັນ ແລະເປັນປະຊາຄົມຮ່ວມຊະຕາກຳທີ່ມີຄວາມໝາຍຍຸດທະສາດ. ພັກກອມມູນິດຈີນຍິນດີຮ່ວມກັບພັກກອມມູນິດຫວຽດນາມ ລົງເລິກຈັດຕັ້ງປະຕິບັດຂໍ້ຕົກລົງທີ່ສຳຄັນລະຫວ່າງທ່ານ ສີຈິ້ນຜິງ ເລຂາທິການໃຫຍ່ພັກກອມມູນິດຈີນ ແລະທ່ານ ຫງວຽນຟູຈ້ອງ ເລຂາທິການໃຫຍ່ພັກກອມມູນິດຫວຽດນາມ, ກຳແໜ້ນທິດທາງທີ່ຖືກຕ້ອງຂອງການຂະຫຍາຍສາຍພົວສອງພັກສອງລັດ, ເພີ່ມທະວີການແລກປ່ຽນບົດຮຽນໃນການປົກຄອງລັດ, ລົງເລິກການຮ່ວມມືທີ່ແທດເໝາະກັບຕົວຈິງໃນທຸກຂົງເຂດ, ຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ ຂະຫຍາຍຕົວຢ່າງປອດໃສແລະໜັກແໜ້ນຍາວນານ.
ທ່ານ ຟາມມິງຈິງ ກ່າວວ່າ, ຫວຽດນາມຊົມເຊີຍຈີນທີ່ໄດ້ຮັບໝາກຜົນໃນການປະສານງານແລະຊຸກຍູ້ການວາງ "4 ຍຸດທະສາດ" ແລະການປະກອບສ່ວນອັນພົ້ນເດັ່ນເພື່ອສັນຕິພາບແລະການພັດທະນາຂອງພາກພື້ນກໍຄືຂອງໂລກເປັນຢ່າງສູງ, ພັກກອມມູນິດຫວຽດນາມຍິນດີລົງເລິກການພົວພັນກັບພັກກອມມູນິດຈີນຢ່າງຮອບດ້ານ ເພື່ອຮ່ວມກັນຊີ້ນຳສາຍພົວພັນສອງປະເທດໃຫ້ຂະຫຍາຍຕົວດີຂຶ້ນກວ່າເກົ່າ.
 |
