ກອງປະຊຸມຫາລືວຽກງານດ່ານພາສີຈີນ-ລາວຄັ້ງທຳອິດໄດ້ຈັດຂຶ້ນຢູ່ເມືອງຊຽງຮຸ່ງແຂວງຢຸນນານ ສປ ຈີນໃນວັນທີ 12-13 ທັນວານີ້ ໂດຍຜູ້ຕາງໜ້າ 31 ທ່ານຈາກດ່ານພາສີຄຸນໝິງຈີນແລະດ່ານພາສີລາວທີ່ເຂົ້າຮ່ວມນັ້ນໄດ້ແລກປ່ຽນຄວາມເຫັນກ່ຽວກັບການຈັດຕັ້ງປະຕິບັດມາດຕະການທີ່ລະບຸໄວ້ໃນ "ແຜນການຮ່ວມມືລະຫວ່າງດ່ານພາສີຈີນ-ລາວ" ທີ່ລົງນາມໃນເດືອນກັນຍາຜ່ານມາ ໂດຍສະເພາະໄດ້ປຶກສາຫາລືເພື່ອສະໜັບສະໜູນການກໍ່ສ້າງເຂດຮ່ວມມືເສດຖະກິດບໍ່ເຕັນ-ບໍ່ຫານກໍຄືການສ້າງທາງລົດໄຟລະຫວ່າງສອງປະເທດ.
ຈາກນີ້, ສອງຝ່າຍໄດ້ລົງນາມໃນບົດບັນທຶກກອງປະຊຸມໂດຍສະແດງໃຫ້ເຫັນວ່າ: ສອງຝ່າຍສະໜັບສະໜູນການກໍ່ສ້າງເຂດຮ່ວມມືເສດຖະກິດບໍ່ເຕັນ-ບໍ່ຫານ ເພື່ອສ້າງເງື່ອນໄຂອຳນວຍຄວາມສະດວກໃຫ້ແກ່ວິສາຫະກິດຢຸນນານແລະລາວໃນການຜ່ານດ່ານ ທັງຍົກລະດັບປະສິດທິຜົນການຜ່ານດ່ານໃຫ້ສູງແລະກະທະຮັດງ່າຍຂຶ້ນ. ຂະນະດຽວກັນ, ສອງຝ່າຍຈະເປີດປ່ອງຢ້ຽມສີຂຽວແລະທາງຜ່ານສະເພາະ ທັງກວດກາຮ່ວມກັນແລະສຶກສາຄວາມເປັນໄປໄດ້ໃນການຮັບຮອງຜົນການກວດກາສອງຝ່າຍ ເພື່ອຮັບປະກັນໃຫ້ວັດຖຸກໍ່ສ້າງທາງລົດໄຟຈີນ-ລາວຜ່ານດ່ານຢ່າງໄວວາ. ນອກນີ້, ສອງຝ່າຍຈະລົງເລິກການຮ່ວມມືໃນການແລກປ່ຽນຂໍ້ມູນຂ່າວສານ, ການປະຕິບັດກົດໝາຍແລະອື່ນໆ ທັງເນັ້ນຍົກລະດັບການຮ່ວມມືໃນການຕໍ່ຕ້ານການຄ້າເຖື່ອນສະບຽງອາຫານ, ສັດແລະພືດທີ່ໃກ້ຈະສູນພັນ, ຢາເສບຕິດໃຫ້ສູງຂຶ້ນກວ່າເກົ່າ.