ວັນທີ 21 ພະຈິກ 2016 ນີ້ເປັນວັນຄົບຮອບ 1 ປີແຫ່ງການປະສົບຜົນສຳເລັດໃນການສົ່ງດາວທຽມ "ລາວ-1" (SAT1) ທີ່ເປັນດາວທຽມໂທລະຄົມໜ່ວຍທຳອິດຂອງລາວຂຶ້ນສູ່ວົງໂຄຈອນຈາກສູນປ່ອຍດາວທຽມຊີ່ຊ່າງ ສປ ຈີນ ແລະດາວທຽມລາວທີ່ຮ່ວມມືກັບຈີນໜ່ວຍດັ່ງກ່າວໄດ້ສ້າງຄວາມຕື່ນເຕັ້ນທີ່ສຸດ ທັງໄດ້ນຳເອົາຜົນປະໂຫຍດຫຼາຍຢ່າງຕໍ່ການດຳລົງຊີວິດຂອງປະຊາຊົນລາວອີກດ້ວຍ. ເຈົ້າໜ້າທີ່ແລະປະຊາຊົນລາວຕ່າງກໍຢືນຢັນໃນໂອກາດໃຫ້ສຳພາດຕໍ່ນັກຂ່າວກ່ອນໜ້ານີ້ບໍ່ດົນວ່າ ດາວທຽມລາວ-1ໄດ້ສ້າງປະສິດທິຜົນໃຫ້ຕົນຢ່າງເໜືອຄາດຄິດ.
ເດືອນກຸມພາຜ່ານມາ, ລາວແລະບໍລິສັດດາວທຽມໂທລະຄົມເຄື່ອນທີ່ອາຊີປາຊີຟິກຈີນຈຳກັດໄດ້ຮ່ວມທຶນສ້າງຕັ້ງບໍລິສັດດາວທຽມອາຊີປາຊີຟິກລາວຈຳກັດເພື່ອຮັບຜິດຊອບ ຄຸ້ມຄອງແລະດຳເນີນທຸລະກິດຂອງດາວທຽມ "ລາວ-1".ທ່ານແກ້ວລະວັນ ອຸດທາວົງ ທີ່ຮັບຜິດຊອບ ຄຸ້ມຄອງແລະຕິດຕາມດາວທຽມລາວແລະເປັນໜຶ່ງໃນບັນດາພະນັກງານລາວທີ່ໄປຝຶກອົບຮົມຢູ່ນະຄອນຫຼວງປັກກິ່ງກ່າວວ່າ: "ພວກເຮົາໄດ້ໄປຝຶກອົບຮົມຢູ່ສປຈີນຈິ່ງມີຄວາມຮູ້ຄວາມສາມາດໃນການບັນຊາແລະຄຸ້ມຄອງດາວທຽມ,ສະເພາະພະນັກງານເຮົາທຸກຄົນລ້ວນແຕ່ມີຄວາມຮູ້ຄວາມສາມາດທັງມີຄວາມເຫັນດີແລະພາກພູມໃຈທີ່ໄດ້ເປັນສ່ວນໜຶ່ງຂອງໂຄງການດາວທຽມລາວໃນຄັ້ງນີ້,ດາວທຽມລາວບໍ່ພຽງແຕ່ໃຊ້ພາຍໃນເທົ່ານັ້ນຍັງສາມາດໃຫ້ປະເທດອື່ນເຊົ່າໄດ້ເຊິ່ງ ຈະສາມາດສ້າງລາຍຮັບໃຫ້ແກ່ລັດຖະບານແລະຈະຊ່ວຍຊຸກຍູ້ພັດທະນາເສດຖະກິດສັງຄົມຂອງລາວອີກດ້ວຍ."
ດາວທຽມ "ລາວ-1"ໄດ້ບໍລິການຕ່າງໆໃຫ້ແກ່ປະເທດລາວເປັນຕົ້ນ ການຖ່າຍທອດສົດໂທລະພາບຜ່ານດາວທຽມ, ການເຊື່ອມລະບົບອິນເຕີເນັດຄວາມໄວສູງບໍ່ມີສາຍ, ໂທລະຄົມສາກົນແລະອື່ນໆໂດຍປົກຄຸມຮົງກົງຈີນ, ລາວ,ມຽນມາ, ອິນໂດເນເຊຍແລະປະເທດກໍຄືເຂດແຄວ້ນອື່ນໆ.ປັດຈຸບັນ, ລາວໄດ້ນຳເອົາລາຍການໂທລະພາບຕ່າງໆບໍ່ວ່າຈະເປັນລາຍການກິລາ,ເດັກນ້ອຍແລະບັນເທີງຈາກຈີນ,ອາເມລິກາເອີຣົບ,ຍີ່ປຸ່ນແລະສ.ເກົາຫຼີຫຼາຍສິບຊ່ອງໂດຍຄົນລາວພຽງແຕ່ຊື້ເຄື່ອງSTBແລະເສຍເງິນ 3ຫາ 4 ໂດລາສະຫະລັດຕໍ່ເດືອນເທົ່ານັ້ນກໍຈະສາມາດຮັບຊົມລາຍການໂທລະພາບທີ່ຫຼາກຫຼາຍປະທັບໃຈຫຼາຍຂຶ້ນ.
ການສຶກສາທາງໄກເປັນໜຶ່ງໃນບົດບາດສຳຄັນຂອງດາວທຽມລາວໃນປັດຈຸບັນໂດຍໂຮງຮຽນລຽວໂຕໄດ້ສຳເລັດການທົດລອງການສຶກສາທາງໄກແລ້ວ ແລະຈະພິຈາລະນາຊຸກຍູ້ການສຶກສາທາງໄກໃນທົ່ວປະເທດ. ເຖິງວ່າລາວເປັນປະເທດທີ່ມີພູດອຍກວມເອົາສ່ວນຫຼາຍກໍຕາມ, ແຕ່ຈາກການສຶກສາທາງໄກດ້ວຍດາວທຽມຈະເຮັດໃຫ້ນັກຮຽນຢູ່ເຂດຊົນນະບົດຫ່າງໄກສອກຫຼີກສາມາດໄດ້ຮັບການສຶກສາທີ່ມີຄຸນນະພາບ. ທ່ານ ໄຊລີຊາ ອິນສີຊຽງໃໝ່ ຫົວໜ້າກົມສື່ສານກະຊວງໄປສະນີ, ໂທລະຄົມມະນາຄົມ ແລະ ການສື່ສານລາວກ່າວວ່າ: "ການສຶກສາທາງໄກເປັນຜົນດີຕໍ່ປະຊາຊົນໂດຍສະເພາະເດັກນ້ອຍຢູ່ຊົນນະບົດທີ່ເຂົາເຈົ້າບໍ່ມີປຶ້ມຮຽນ, ອາຈານແລະຂໍ້ມູນຂ່າວສານທີ່ຄວນຈະໄດ້ຮັບ, ພວກເຮົາກໍອາດຈະສະໜອງການສຶກສາດ້ວຍດາວທຽມໄດ້. ຄິດວ່າເປັນຈຸດໜຶ່ງທີ່ພວກເຮົາຕ້ອງໄດ້ສືບຕໍ່ຮ່ວມມືກັບຫຼາຍພາກສ່ວນເພື່ອໃຫ້ປາກົດຜົນເປັນຈິງທັງນຳເອົາຜົນປະໂຫຍດທີ່ແທ້ຈິງມາສູ່ປະຊາຊົນຢູ່ເຂດຊົນນະບົດ."
ທ່ານ ຕິງຢອງປິ່ງ ຜູ້ອຳນວຍ ການໃຫຍ່ບໍລິສັດດາວທຽມອາຊີປາຊິຟິກລາວຈຳກັດ ກ່າວເຖິງການພັດທະນາດາວທຽມລາວໃນຕໍ່ໜ້າວ່າ: "ອີກບໍ່ດົນພວກເຮົາຈະບໍລິການອິນເຕີເນັດບໍ່ມີສາຍ ຫຼື WIFI ຢູ່ນະຄອນຫຼວງວຽງຈັນ, ຫຼວງພະບາງ, ວັງວຽງ, ສະຫວັນນະເຂດແລະປາກເຊ ໂດຍບໍລິການດັ່ງກ່າວຈະປົກຫຸ້ມທັງອາກາດເຖິງພື້ນດິນ ເພື່ອເຮັດໃຫ້ປະຊາຊົນລາວສຳຜັດກັບເຕັກໂນໂລຊີທັນສະໄໝທີ່ເຊື່ອມໂຍງກັບພາຍນອກໂດຍບໍ່ຕ້ອງອອກຈາກເຮືອນ."
ທ່ານ ໄຊລີຊາ ອິນສີຊຽງໃໝ່ ກ່າວໂດຍຄາດຫວັງຕໍ່ດາວທຽມລາວທີ່ຈະນຳເອົາຄວາມສະດວກມາສູ່ຊີວິດການເປັນຢູ່ຂອງປະຊາຊົນວ່າ: "ຂ້າພະເຈົ້າເຊື່ອໝັ້ນວ່າ, ອີກບໍ່ດົນຕໍ່ໜ້າ, ດາວທຽມລາວຈະສາມາດຊ່ວຍການບໍລິການໂທລະຄົມມະນາຄົມ, ການສື່ສານ, ອິນເຕີເນັດລວມທັງການສຶກສາທາງໄກ, ການແພດທາງໄກ ຫຼືຊ່ວຍໃນກໍລະນີສຸກເສີນເປັນຕົ້ນໄພພິບັດ, ໄພທຳມະຊາດ ດາວທຽມລາວກໍສາມາດຊ່ວຍໄດ້ ເພື່ອນຳເອົາແລະສົ່ງຂໍ້ມູນເຂົ້າມາຫາສູນກາງ. ແນ່ນອນ, ການຮ່ວມມືໃນວຽກງານດາວທຽມກັບ ສປ ຈີນກໍຈະໄດ້ຮັບການພັດທະນາກ້າວໜ້າເລື້ອຍໆໂດຍໃນໃນຕໍ່ໜ້າ, ຜົນປະໂຫຍດດ່ັງກ່າວຈະເກີນມູນຄ່າຂອງດາວທຽມ."
