ໂອກາດໃຫ້ສຳພາດຕໍ່ສື່ມວນຊົນລາວ-ຈີນໃນວັນທີ 13 ທັນວານີ້, ທ່ານຟ້າສະໜັ່ນ ທຳມະວົງ ຫົວໜ້າພະແນກໂຍທາທິການແລະຂົນສົ່ງແຂວງຫຼວງພະບາງຢືນຢັນວ່າ ໃນວັນທີ 25 ທັນວານີ້ຈະຈັດພິທີເປີດການກໍ່ສ້າງທາງລົດໄຟລາວ-ຈີນຢ່າງເປັນທາງການຢູ່ຈຸດບ້ານພອນໄຊເມືອງຫຼວງພະບາງແຂວງຂອງຕົນໂດຍມີຄວາມຍາວ 80 ກິໂລແມັດ. ແນວໃດກໍດີ ເນື່ອງຈາກທາງລົດໄຟບາງຍ່ານຕ້ອວຜ່ານນ້ຳຂອງໂດຍສະເພາະລະຫວ່າງບ້ານມ່ວງຄຳເມືອງຈອມເພັດກັບບ້ານພອນໄຊເມືອງຫຼວງພະບາງຈິ່ງຈຳເປັນຕ້ອງກໍ່ສ້າງຂົວ ເຊິ່ງຄາດວ່າໃຫ້ສຳເລັດພາຍໃນ 2 ປີ.
ທ່ານຟ້າສະໜັ່ນກ່າວວ່າ:ຄາດວ່າ ທ່ານທອງລຸນສີສຸລິດ ນາຍົກລັດຖະມົນຕີ, ເຈົ້າໜ້າທີ່ຂັ້ນສູງແຂວງຫຼວງພະບາງແລະຜູ້ຕາງໜ້າກົມທາງລົດໄຟຈີນທີ 8 ຈະເຂົ້າຮ່ວມພິທີລົງມືກໍ່ສ້າງ ແລະຄະນະກຳມະການປະສານງານໂຄງການກໍ່ສ້າງທາງລົດໄຟແຂວງຂອງຕົນກໍໄດ້ລະດົມພໍ່ແມ່ປະຊາຊົນບ້ານຕ່າງໆທີ່ໄດ້ຮັບຜົນກະທົບຈາກການກໍ່ສ້າງທາງລົດໄຟຈີນ-ລາວນັ້ນຕັ້ງໜ້າມີສ່ວນຮ່ວມໃນໂຄງການດັ່ງກ່າວ ນອກນີ້ຍັງມີ 300 ກວ່າຫົວໜ່ວຍທຸລະກິດໄດ້ສະແດງເຈດຈຳນົງໃນການສະໜອງຫີນຊາຍແລະເປຕົງໃຫ້ໂຄງການ, ແຕ່ ຫີນຊາຍຈາກນ້ຳຂອງແລະແມ່ນ້ຳອື່ນອາດຈະບໍ່ໄດ້ມາດຕະຖານແລະບໍ່ເໝາະນຳໃຊ້ໃນການກໍ່ສ້າງທາງລົດໄຟຈີນ-ລາວ.