ວັນທີ 15 ທັນວານີ້, ການຝຶກຊ້ອມປະສົມການກູ້ໄພມະນຸດສະທຳ "ມັງກອນຄຳ-2016" ລະຫວ່າງກອງທັບຈີນ-ກຳປູເຈຍໄດ້ຈັດພິທີເປີດຢູ່ສະຖາບັນທະຫານບົກແຂວງຄຳປົງຂອງກຳປູເຈຍ. ນີ້ແມ່ນກອງທັບຈີນແລະກຳປູເຈຍຈັດການຝຶກຊ້ອມປະສົມຄັ້ງທຳອິດ.
ທ່ານໂປ ຊະໂຣອຸນ ຜູ້ບັນຊາການໃຫຍ່ກອງທັບກຳປູເຈຍ, ທ່ານຊົງໂປ່ ເອກອັກຄະລັດຖະທູດຈີນປະຈຳກຳປູເຈຍ, ທ່ານຫວງມິງ ຜູ້ບັນຊາການກຸ່ມທະຫານບົກທີ 41 ຂອງຈີນ, ນາຍແລະພົນທະຫານຂອງກອງທັບສອງປະເທດໄດ້ເຂົ້າຮ່ວມພິທີດັ່ງກ່າວ.
ໃນໂອກາດກ່າວປາໄສ, ທ່ານໂປ ຊະໂຣອຸນ ກ່າວວ່າ, ການຝຶກຊ້ອມປະສົມເທື່ອນີ້ແມ່ນການຝຶກຊ້ອມປະສົມຄັ້ງທຳອິດລະຫວ່າງກອງທັບສອງປະເທດ, ກໍເພື່ອເພີ່ມທະວີການພົວພັນລະຫວ່າງສອງປະເທດໃນຂົງເຂດການທະຫານ, ບູລະນະການຮ່ວມມືແລະມິດຕະພາບລະຫວ່າງສອງປະເທດໃຫ້ໝັ້ນຄົງກວ່າເກົ່າ.
ກ່ານຊົງໂປກ່າວວ່າ, ການຝຶກຊ້ອມປະສົມເທື່ອນີ້ເປັນຂີດໝາຍວ່າການແລກປ່ຽນແລະການຮ່ວມມືລະຫວ່າງກອງທັບສອງປະເທດໄດ້ກ້າວຂຶ້ນຢູ່ລະດັບໃໝ່, ຫວັງໃຫ້ສອງຝ່າຍຖືການຝຶກຊ້ອມປະສົມເທື່ອນີ້ເປັນໂອກາດທີ່ດີ, ຍົກສູງລະດັບການປະສານສົມທົບແລະການຮ່ວມມືຢ່າງບໍ່ຢຸດຢັ້ງ, ຖືການຝຶກຊ້ອມປະສົມເທື່ອນີ້ເປັນກົນໄກສຳຄັນທີ່ພັດທະນາແລະລົງເລິກການຮ່ວມມືລະຫວ່າງກອງທັບສອງປະເທດ.