ພາຍຫຼັງໄດ້ເຈລະຈາກັນຢູ່ເມືອງນາກາໂຕ ແຂວງຢາມາກູຊີຂອງຍີ່ປຸ່ນໃນວັນທີ 15 ທັນວານີ້ແລ້ວ, ວັນທີ 16 ທັນວານີ້, ທ່ານຊິນໂຈະອາເບະ ນາຍົກລັດຖະມົນຕີຍີ່ປຸ່ນແລະທ່ານວະລະຕິເມຍ ປູຕີນ ປະທານາທິບໍດີຣັດເຊຍໄດ້ຍ້າຍໄປເຈລະຈາກັນອີກຢູ່ນະຄອນຫຼວງໂຕກຽວ. ສອງຝ່າຍເຫັນດີເປັນເອກະສັນກັນວ່າຈະເລີ່ມດຳເນີນການປຶກສາຫາລືກ່ຽວກັບການເຄື່ອນໄຫວຮ່ວມດ້ານເສດຖະກິດຢູ່ສີ່ເກາະພາກເໜືອ(ຣັດເຊຍເອີ້ນວ່າໝູ່ເກາະຄຸຣິວສ໌ພາກໃຕ້), ແຕ່ໃນບັນຫາອະທິປະໄຕຂອງເກາະດອນຕ່າງໆທີ່ມີຄວາມຂັດແຍ້ງກັນຍັງບໍ່ທັນມີຄວາມຄືບໜ້າໃໝ່.
ພາຍຫຼັງການເຈລະຈາໄດ້ສິ້ນສຸດລົງແລ້ວ, ສອງຝ່າຍໄດ້ໃຫ້ສຳພາດຕໍ່ນັກຂ່າວຮ່ວມກັນ. ໃນເວລາຕອບຄຳຖາມກ່ຽວກັບສີ່ເກາະພາກເໜືອ, ທ່ານຊິນໂຈະອາເບະກ່າວວ່າ: ຍີ່ປຸ່ນກັບຣັດເຊຍຈະດຳເນີນການປຶກສາຫາລືກ່ຽວກັບ"ລະບຽບການພິເສດ"ຂອງການດຳເນີນການເຄື່ອນໄຫວຮ່ວມດ້ານເສດຖະກິດຢູ່ສີ່ເກາະພາກເໜືອ, ແຕ່ຫຼັກໝັ້ນຫຼັກການຂອງຍີ່ປຸ່ນໃນບັນຫາຜືນແຜ່ນດິນທາງພາກເໜືອບໍ່ມີການປ່ຽນແປງ.
ໃນກອງປະຊຸມຂ່າວ, ທ່ານປູຕີນໄດ້ຫວນຄືນໂດຍຫຍໍ້ກ່ຽວກັບປະຫວັດສາດມອບຮັບຜືນແຜ່ນດິນລະຫວ່າງສອງຝ່າຍພາຍຫຼັງສົງຄາມຍີ່ປຸ່ນຣັດເຊຍ, ແລະກ່າວເນັ້ນວ່າ ອະດີດສະຫະພາບໂຊວຽດໄດ້ຮັບໝູ່ເກາະຄຸຣິວສ໌ພາກໃຕ້ຫຼັງສົງຄາມໂລກຄັ້ງທີ 2. ທ່ານກ່າວວ່າ: ຝ່າຍຣັດເຊຍເຫັນວ່າຄວນສິ້ນສຸດການກະທຳທີ່ກ່າວເນັ້ນເຈດຈຳນົງຂອງຕົນເທື່ອແລ້ວເທື່ອອີກໂດຍໝູນອ້ອມບັນຫາຜືນແຜ່ນດິນ.
ສອງຝ່າຍໄດ້ອອກຖະແຫຼງການສື່ມວນຊົນຫຼັງກອງປະຊຸມໂດຍຂຽນວ່າ: ສອງຝ່າຍຮຽກຮ້ອງໃຫ້ພາກສ່ວນທີ່ກ່ຽວຂ້ອງຂອງລັດຖະບານເລີ່ມດຳເນີນການປຶກສາຫາລືກ່ຽວກັບບັນຫາຕ່າງໆເຊັ່ນ ເງື່ອນໄຂ ຮູບການແລະຂົງເຂດດຳເນີນການເຄື່ອນໄຫວຮ່ວມດ້ານເສດຖະກິດຢູ່ສີ່ເກາະພາກເໜືອ, ເຫັນວ່ານີ້ຈະກາຍເປັນບາດກ້າວສຳຄັນໃນການເຊັນສົນທິສັນຍາສັນຕິພາບ. ແຕ່ພ້ອມກັນນັ້ນ, ຖະແຫຼງການຍັງກ່າວເນັ້ນວ່າ: ຈຸດຢືນຂອງການເຄື່ອນໄຫວຮ່ວມດ້ານເສດຖະກິດແມ່ນບໍ່ທຳລາຍຫຼັກໝັ້ນຂອງສອງຝ່າຍກ່ຽວກັບບັນຫາສົນທິສັນຍາສັນຕິພາບ.
ກ່ອນຈະເດີນທາງໄປຢ້ຽມຢາມຍີ່ປຸ່ນ,ທ່ານປູຕີນເຄີຍກ່າວເນັ້ນວ່າ: ລະຫວ່າງຣັດເຊຍກັບຍີ່ປຸ່ນບໍ່ມີບັນຫາຜືນແຜ່ນດິນ. ຕອນຄ່ຳວັນທີ 15 ທັນວານີ້, ທ່ານດີມິດຣີ ເປັສຄົຟ ໂຄສົກປະທານາທິບໍດີຣັດເຊຍກ່າວວ່າ: ບັນຫາອະທິປະໄຕຂອງໝູ່ເກາະຄຸຣິວສ໌ພາກໃຕ້ບໍ່ໄດ້ກ່າວເຖິງໃນການເຈລະຈາປະມຸກລັດ, ອະທິປະໄຕຂອງຣັດເຊຍທີ່ມີຕໍ່ເກາະດອນຕ່າງໆບໍ່ຈຳເປັນດຳເນີນການປຶກສາຫາລື.
 |
