ວັນທີ 17 ທັນວານີ້, ຢູ່ທີ່ປັກກິ່ງ, ທ່ານຈູ່ກ່ວງຢ້າວ ຮອງລັດຖະມົນຕີກະຊວງການເງິນຈີນກ່າວວ່າ, ທົ່ວໂລກລ້ວນແຕ່ເອົາໃຈໃສ່ນຳການພົວພັນດ້ານເສດຖະກິດຈີນ-ອາເມລິກາຂະຫຍາຍຕົວຢ່າງປອດໃສ, ການຮ່ວມມືຢ່າງຮອບດ້ານແມ່ນການເລືອກທຸກຍຸດທະສາດທີ່ຖືກຕ້ອງພຽງອັນດຽວລະຫວ່າງສອງປະເທດ, ຕ້ອງປະລະແນວຄິດທີ່ຝ່າຍໜຶ່ງໄດ້ຊະນະໂດຍຖືການເສຍຫາຍຂອງອີກຝ່າຍໜຶ່ງເປັນການທົດແທນ.
ທ່ານຈູ່ກ່ວງຢ້າວແມ່ນໃຫ້ທັດສະນະດັ່ງກ່າວໃນກອງປະຊຸມເສດຖະກິດຈີນປະຈຳປີ 2016-2017 ທີ່ຈັດຂຶ້ນຢູ່ປັກກິ່ງ.
ທ່ານຈູ່ກ່ວງຢ້າວກ່າວວ່າ, ຈີນ ແລະ ອາເມລິກາໜຶ່ງແມ່ນປະເທດທີ່ພວມພັດທະນາທີ່ໃຫຍ່ທີ່ສຸດໃນໂລກ, ອີກອັນໜຶ່ງແມ່ນປະເທດທີ່ພັດທະນາແລ້ວທີ່ໃຫຍ່ທີ່ສຸດໃນໂລກ, ການພົວພັນດ້ານເສດຖະກິດລະຫວ່າງສອງປະເທດນີ້ຈະສົ່ງຜົນສະທ້ອນໄປສູ່ທົ່ວໂລກ ແລະ ມີບົດບາດສຳຄັນຕໍ່ການພັດທະນາເສດຖະກິດຂອງໂລກ. ການຮ່ວມມືກັນແມ່ນການເລືອກທີ່ຖືກຕ້ອງພຽງອັນດຽວລະຫວ່າງສອງປະເທດ.
ກ່ຽວກັບບັນຫາທີ່ ຈີນ ກັບ ອາເມລິກາຈະຂະຫຍາຍເສດຖະກິດການຄ້າແນວໃດພາຍໃຕ້ສະຖານະການໃໝ່? ທ່ານຈູ່ກ່ວງຢ້າວກ່າວວ່າ, ທີ່ສຳຄັນກໍ່ແມ່ນສືບຕໍ່ຍຶດໝັ້ນຫັຼກການທີ່ບໍ່ເປັນບໍລະປັກກັນ, ບໍ່ປະທະກັນູ, ເຄົາລົບເຊິ່ງກັນແລະກັນ, ຮ່ວມມືກັນເພື່ອຕ່າງຝ່າຍຕ່າງໄດ້ຮັບຜົນປະໂຫຍດນຳກັນ, ປະຖິ້ມແນວຄິດທີ່ຝ່າຍໜຶ່ງໄດ້ຮັບຜົນປະໂຫຍດໂດຍຖືເອົາການເສຍຫາຍຂອງອີກຝ່າຍໜຶ່ງເປັນການທົດແທນ, ແກ້ໄຂຂໍ້ຂັດແຍ່ງ ແລະ ບັນຫາຕ່າງໆຢ່າງເໝາະສົມ, ເພິ່ມທະວີການແລກປ່ຽນດ້ານນະໂຍບາຍ, ແລະນຳໃຊ້ກົນໄກຫຼາຍຝ່າຍ ເຊັ່ນ, ອົງການການຄ້າໂລກ ຫຼື WTO ເປັນຕົ້ນເພື່ອປຶກສາຫາລືກັນ, ຕ້ອງຫຼີກເວັ້ນບໍ່ໃຫ້ເກີດສົງຄາມດ້ານການຄ້າ ຈົນເຮັດໃຫ້ສອງຝ່າຍເສຍຫາຍໝົດ.