ວັນທີ 22 ທັນວານີ້ຢູ່ນະຄອນຫຼວງຮ່າໂນ້ຍ ສສຫວຽດນາມ, ທ່ານຫງວຽນຟູຈອງ ເລຂາທິການໃຫຍ່ສູນກາງພັກກອມມູນິດຫວຽດນາມໄດ້ພົບປະກັບທ່ານຫຼິວສີປາວ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກກອມມູນິດຈີນໃນໂອກາດເດີນທາງເຂົ້າຮ່ວມການສຳມະນາທິດສະດີພັກຈີນ-ຫວຽດນາມຄັ້ງທີ 12.
ທ່ານຫຼິວສີປາວຢືນຢັນວ່າ ຈີນແລະຫວຽດນາມເປັນປະເທດສັງຄົມນິຍົມທີ່ມີມິດຕະພາບຖານບ້ານໃກ້ເຮືອນຄຽງ ແລະພາຍໃຕ້ສະຖານະການໃໝ່, ຈີນຍິນດີຮ່ວມກັບຫວຽດນາມຕີລາຄາແລະກຳແໜ້ນສາຍພົວພັນສອງຝ່າຍຈາກລະດັບຍຸດທະສາດແລະແງ່ມຸມທີ່ຍາວໄກຢ່າງສະເໝີຕົ້ນສະເໝີປາຍທັງຍຶດໝັ້ນທິດທາງ "ໝັ້ນທ່ຽງຍາວນານ,ຫັນໜ້າສູ່ອະນາຄົດ,ມິດຕະພາບຖານບ້ານໃກ້ເຮືອນຄຽງ ແລະຮ່ວມມືຮອບດ້ານ" ແລະປະຕິບັດຕາມຈິດໃຈ "ເປັນເພື່ອນບ້ານທີ່ດີ, ເພື່ອນມິດທີ່ດີ,ສະຫາຍທີ່ດີແລະຄູ່ຮ່ວມມືທີ່ດີຕະຫຼອດໄປ" ທັງຈັດຕັ້ງປະຕິບັດຕາມຄວາມຮັບຮູ້ທີ່ເປັນເອກະພາບກັນລະຫວ່າງເລຂາທິການໃຫຍ່ຂອງສອງພັກໃຫ້ມີປະສິດທິຜົນ ແລະຊຸກຍູ້ສາຍພົວພັນຈີນ-ຫວຽດນາມຂະຫຍາຍຕົວຢ່າງຕໍ່ເນື່ອງ,ປອດໃສແລະໝັ້ນທ່ຽງ.
ທ່ານຫງວຽນຟູຈອງໄດ້ສົ່ງຄວາມອວຍພອນທີ່ດີງາມເຖິງທ່ານເລຂາທິການໃຫຍ່ສີຈິ້ນຜິງ ແລະຊົມເຊີຍຜົນສຳເລັດກອງປະຊຸມຄົບຄະນະເທື່ອທີ 6 ສະໄໝທີ 18ຂອງພັກກອມມູນິດຈີນ ທັງຢືນຢັນວ່າ ຫວຽດນາມຍິນດີຮັດແໜ້ນການໄປມາສູ່ກັນລະຫວ່າງການນຳຂັ້ນສູງກັບຈີນ, ລົງເລິກການແລກປ່ຽນບົດຮຽນໃນການຄຸ້ມຄອງພັກແລະບໍລິຫານລັດ ທັງຊຸກຍູ້ການການແລກປ່ຽນຮ່ວມມືໃນຂົງເຂດຕ່າງໆເພື່ອປັບປຸງແລະເສີມຂະຫຍາຍມິດຕະພາບຫວຽດນາມ-ຈີນທີ່ເປັນມູນເຊື້ອແລະສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ແໜ້ນແຟ້ນຍິ່ງຂຶ້ນ.