ພິທີເປີດປ້າຍແລະສ້າງຕັ້ງສູນຄົ້ນຄວ້າຫວຽດນາມຂອງມະຫາວິທະຍາໄລພາສາຕ່າງປະເທດປັກກິ່ງ ສປ ຈີນໄດ້ຈັດຂຶ້ນຢູ່ນະຄອນຫຼວງປັກກິ່ງໃນຕອນເຊົ້າວັນທີ 22 ທັນວານີ້ ໂດຍສູນດັ່ງກ່າວທີ່ສ້າງຂຶ້ນໂດຍມະຫາວິທະຍາໄລພາສາຕ່າງປະເທດປັກກິ່ງ ແລະມະຫາວິທະຍາໄລວິທະຍາສາດວັດທະນະທຳແລະສັງຄົມຂອງມະຫາວິທະຍາໄລແຫ່ງຊາດຮ່າໂນ້ຍຫວຽດນາມນັ້ນ ຈະສຸມໃສ່ຄົ້ນຄວ້າພາສາ, ວັດທະນະທຳແລະພາກພື້ນຫວຽດນາມ.
ທ່ານ ເພີງລົງ ອະທິການບໍດີມະຫາວິທະຍາໄລພາສາຕ່າງປະເທດປັກກິ່ງກ່າວໃນພິທີດັ່ງກ່າວວ່າ, ການສ້າງຕັ້ງສູນຄົ້ນຄວ້າຫວຽດນາມ ຈະຊຸກຍູ້ການແລກປ່ຽນຢ້ຽມຢາມເຊິ່ງກັນແລະກັນລະຫວ່າງເຈົ້າໜ້າທີ່ຂະແໜງການສຶກສາສອງປະເທດຈີນ-ຫວຽດນາມ ແລະເຮັດໃຫ້ຊາວໜຸ່ມສອງປະເທດເຂົ້າໃຈກັນຢ່າງເລິກເຊິ່ງກວ່າເກົ່າ. ຂະນະດຽວກັນ, ສູນຄົ້ນຄວ້າດັ່ງກ່າວຈະເພີ່ມທະວີການອົບຮົມແລະແລກປ່ຽນຖັນແຖວຄູອາຈານ, ສ້າງໂອກາດໃຫ້ນັກສຶກສາປະກອບອາຊີບແລະໄປສຶກສາຢູ່ແຕ່ລະປະເທດ ເພື່ອບັນລຸການນຳໃຊ້ຊັບພະຍາກອນການສຶກສາຮ່ວມກັນ.
ທ່ານ ຟາມກວາງມິງ ອະທິການບໍດີມະຫາວິທະຍາໄລວິທະຍາສາດວັດທະນະທຳແລະສັງຄົມຂອງມະຫາວິທະຍາໄລແຫ່ງຊາດຮ່າໂນ້ຍຫວຽດນາມ ກ່າວວ່າ, ການສຶກສາແມ່ນວຽກງານທີ່ສຳຄັນທີ່ສຸດຂອງປະເທດໜຶ່ງ ແລະໃນໂອກາດນີ້ ຂໍສະແດງຄວາມຂອບໃຈຈີນທີ່ໄດ້ສະໜັບສະໜູນແລະໃຫ້ຄວາມສຳຄັນຕໍ່ຫວຽດນາມໃນການພັດທະນາການສຶກສາ ແລະຍິນດີຮ່ວມກັບທ່ານ ເພີງລົງ ເພື່ອບັນລຸການຮ່ວມມືລະຫວ່າງສອງມະຫາວິທະຍາໄລໃຫ້ຫຼາຍກວ່າເກົ່າ.
 |
