4 ປະເທດ ຄື ຈີນ, ລາວ, ມຽນມາ ແລະ ໄທໄດ້ປະສົບຜົນສຳເລັດຢ່າງຈົບງາມໃນການລາດຕະເວນຮ່ວມປະຕິບັດກົດໝາຍຕາມລຳແມ່ນ້ຳຂອງຄັ້ງທີ 53 ໃນວັນທີ 23 ທັນວານີ້ ໂດຍການລາດຕະເວນຮ່ວມປະຕິບັດກົດໝາຍເທື່ອນີ້ໄດ້ໃຊ້ເວລາ 4 ມື້ 3 ຄືນ ແລະ ມີໄລຍະທາງ 532 ກິໂລແມັດ ໂດຍ 4 ປະເທດດັ່ງກ່າວໄດ້ຮ່ວມສົ່ງເຮືອປະຕິບັດກົດໝາຍ 7 ລຳ, ພະນັກງານປະຕິບັດກົດໝາຍ 190 ກວ່າທ່ານ, ຜູ້ບັນຊາການຂອງແຕ່ລະຝ່າຍ ແລະເຈົ້າໜ້າທີ່ພົວພັນ ເພື່ອຮ່ວມບັນຊາ ແລະ ຈັດສົ່ງກຳລັງພະລາທິການ ເພື່ອເພີ່ມຄວາມເຂັ້ມງວດໃນການປະຕິບັດກົດໝາຍ ແລະເປັນການນາບຂູ່ຕໍ່ພວກບໍ່ຫວັງດີ.
ຂ່າວແຈ້ງອີກວ່າ, ກອງເຮືອປະຕິບັດກົດໝາຍໄດ້ແລກປ່ຽນວັດທະນະທຳຢູ່ຈຸດປະສານງານໃນກິ່ງແຂວງສິບສອງພັ່ນນາ ແຂວງຢຸນນານ ສປ ຈີນ ແລະ ເມືອງນາໝໍ້ ສປປ ລາວ ທັງໄດ້ຮ່ວມດຳເນີນການກວດກາ, ຢ້ຽມຢາມປະຊາຊົນທ້ອງຖິ່ນ ແລະ ໂຄສະນາການປາບປາມຢາເສບຕິດ ຢູ່ເຂດນ້ຳໃນເຂດສາມຫຼ່ຽມຄຳ ແລະ ເມືອງນາໝໍ້ເປັນຕົ້ນ.
ຫຼັງໄດ້ພະຍາຍາມຮ່ວມເປັນເວລາເກືອບ 5 ປີ, ການລາດຕະເວນປະຕິບັດກົດໝາຍຕາມລຳແມ່ນ້ຳຂອງມາດຮອດປັດຈຸບັນໄດ້ກາຍເປັນປະເພນີແລ້ວ ໂດຍ 4 ປະເທດດັ່ງກ່າວມີການແລກປ່ຽນກັນນັບມື້ນັບໜັກແໜ້ນ, ການຮ່ວມມື ແລະ ຮູບແບບການປະຕິບັດກົດໝາຍກໍໄດ້ເຂົ້າສູ່ລວງເລິກ ແລະ ຂະຫຍາຍຕົວຢ່າງບໍ່ຢຸດຢັ້ງ ສົ່ງຜົນເຮັດໃຫ້ການເຄື່ອນໄຫວທີ່ລະເມີດກົດໝາຍແລະຕ້ອງໂທດຂ້າມຊາດ ເປັນຕົ້ນ ການຄ້າຂາຍເຖື່ອນ, ລັກລອບຂ້າມຊາຍແດນ, ການກໍ່ການຮ້າຍ, ຄ້າຂາຍຢາເສບຕິດ ແລະ ອາວຸດປືນ ຢູ່ເຂດລ່ອງແມ່ນ້ຳຂອງ ໄດ້ຮັບການແກ້ໄຂຢ່າງມີປະສິດທິຜົນ.
