ປີ 2017 ຈີນຈະສ້າງທາງດ່ວນໃໝ່ໃຫ້ໄດ້ 5 ພັນກິໂລແມັດ
2016-12-26 17:09:39 cri
ຂະແໜງການຄົມມະນາຄົມຂົນສົ່ງຂອງຈີນໄດ້ຕັ້ງເປົ້າໃນປີ 2017 ພັດທະນາລະບົບຄົມມະນາຄົມທາງບົກ ແລະທາງນ້ຳໂດຍຈະລົງທຶນເຖິງ 1800 ຕື້ຢວນ ເພື່ອກໍ່ສ້າງທາງດ່ວນໃໝ່ 5 ພັນກິໂລແມັດ,ສ້ອມແປງເສັ້ນທາງໃນຊົນນະບົດ 2 ແສນກິໂລແມັດ,ປູຄອນກຣິດເສັ້ນທາງໄປສູ່ບ້ານເຂດຫ່າງໄກສອກຫຼີກ 7 ພັນບ້ານ, ສ້າງທາງນ້ຳເພື່ອຍົກລະດັບການແລ່ນເຮືອໄດ້ໃນໄລຍະ 500 ກິໂລແມັດ, ສ້າງເສັ້ນທາງໃຫ້ລົດເມສາມາດແລ່ນເຂົ້າເຖິງ 4000 ບ້ານ.
ຂ່າວແຈ້ງວ່າ, ປີໜ້າ ຂະແໜງການຄົມະມນາຄົມຂອງຈີນຈະເນັ້ນຊຸກຍູ້ການປະຕິຮູບລະບົບຄົມມະນາຄົມຂົນສົ່ງ, ທັງເນັ້ນການຮ່ວມມືກັບປະເທດທີ່ພັດທະນາແລ້ວ, ລວມທັງຈະສ້າງກົນໄກຮ່ວມມືສາກົນສອງຝ່າຍ ແລະຫຼາຍຝ່າຍໃຫ້ສົມບູນຂຶ້ນຕື່ມ, ຊຸກຍູ້ໃຫ້ປະຕິບັດສັນຍາຂົນສົ່ງຂ້າມຊາຍແດນ ແລະຜ່ານຊາຍແດນລະຫວ່າງຈີນ-ມົງໂກລີ-ຣັດເຊຍ, ຈີນ-ກາຊັກສະຖານ-ຣັດເຊຍ ແລະອະນຸພາກພື້ນແມ່ນ້ຳຂອງ ເພື່ອສ້າງຕາໜ່າງ ຄົມມະນາຄົມສາກົນໃຫ້ຄົບຖ້ວນສົມບູນ.
