ປີນີ້, ຈີນບັນລຸການກໍ່ສ້າງທາງດ່ວນໃໝ່ເພີ່ມຂຶ້ນອີກກວ່າ 6.000 ກິໂລແມັດ, ຈາກນີ້, ຈຶ່ງເຮັດໃຫ້ໄລຍະທາງດ່ວນໃນທົ່ວປະເທດເພີ່ມຂຶ້ນເປັນ 1 ແສນ 3 ໝື່ນກວ່າກິໂລແມັດ. ເວົ້າລວມແລ້ວ, ພື້ນຖານໂຄງລ່າງການຄົມມະນາຄົມໄດ້ມີການຂະຫຍາຍຕົວ, ການກໍ່ສ້າງທາງດ່ວນ ແລະ ການຍົກລະດັບທາງຫຼວງທຳມະດາສາຍຫຼັກໄດ້ເລັ່ງໄວຂຶ້ນ, ການຄົມມະນາຄົມຢູ່ເຂດຊົນນະບົດໄດ້ຮັບການປັບປຸງດີຂຶ້ນເລື້ອຍໆ.
ທ່ານຫຼີສຽວເຜິງ ລັດຖະມົນຕີກະຊວງຄົມມະນາຄົມ-ຂົນສົ່ງຈີນ ໄດ້ເນັ້ນໃນກອງປະຊຸມວຽກງານຄົມມະນາຄົມ-ຂົນສົ່ງທົ່ວປະເທດປີ 2017 ທີ່ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 26 ທັນວານີ້ວ່າ: ປີນີ້, ກະຊວງຕົນໄດ້ສຸມໃສ່ການກໍ່ສ້າງລະບົບຄວາມປອດໄພດ້ານການຄົມມະນາຄົມ-ຂົນສົ່ງຢ່າງຮອບດ້ານ ໂດຍສາມາດເຮັດໃຫ້ທາງຫຼວງຮັບປະກັນຄວາມປອດໄພເຖິງ 6 ໝື່ນກິໂລແມັດ. ພ້ອມນີ້ ກໍສາມາດແກ້ໄຂຄວາມອັນຕະລາຍຂອງຂົວ 2.500 ແຫ່ງ, ແກ້ໄຂໄພທໍລະນີສາດຕາມທາງຫຼວງ 75 ແຫ່ງ, ສຳເລັດການກວດກາແລະວັດແທກສະພາບທາງຫຼວງລະດັບຊາດ 26.500 ກິໂລແມັດ ແລະ ຂົວ, ທາງອຸມົງທີ່ສຳຄັນ 50 ແຫ່ງ ພ້ອມດ້ວຍໂຄງການຮັບປະກັນຄວາມປອດໄພຂອງການເດີນເຮືອຕາມແມ່ນ້ຳທີ່ສຳຄັນ.