ຫ້ອງການຖະແຫຼງຂ່າວລັດຖະບານຈີນໄດ້ເຜີຍແຜ່ປື້ມປົກຂາວ "ການບິນອະວະກາດຈີນປີ 2016" ໃນວັນທີ 27 ທັນວານີ້ ເຊິ່ງປື້ມດັ່ງກ່າວປະກອບດ້ວຍ 5 ພາກ ຄື ຈຸດປະສົງ, ວິໄສທັດ ແລະ ຫຼັກການຂອງການພັດທະນາ, ຄວາມຄືບໜ້າໃນໄລຍະແຕ່ປີ 2011 ເປັນຕົ້ນມາ, ໜ້າທີ່ຕົ້ນຕໍໃນ 5 ປີຕໍ່ໜ້າ, ນະໂຍບາຍແລະມາດຕະການການພັດທະນາ ແລະການແລກປ່ຽນແລະຮ່ວມມືກັບສາກົນ.
ປື້ມປົກຂາວລະບຸວ່າ: ລັດຖະບານຈີນຖືເອົາການພັດທະນາພາລະກິດການບິນອະວະກາດເປັນສ່ວນປະກອບສຳຄັນຂອງຍຸດທະສາດການພັດທະນາໂດຍລວມແຫ່ງຊາດ ແລະຍຶດໝັ້ນການຊອກຄົ້ນແລະປະຍຸກໃຊ້ອະວະກາດຊັ້ນນອກໃນທາງສັນຕິພາບຢ່າງສະເໝີຕົ້ນສະເໝີປາຍ.
ປື້ມປົກຂາວ ຊີ້ໃຫ້ເຫັນວ່າ: ນັບແຕ່ປີ 2011 ເປັນຕົ້ນມາ, ພາລະກິດການບິນອະວະກາດຈີນໄດ້ພັດທະນາຢ່າງຕໍ່ເນື່ອງແລະວ່ອງໄວ, ຄວາມສາມາດການປະດິດສ້າງໃໝ່ດ້ວຍຕົນເອງໄດ້ເພີ່ມທະວີຂຶ້ນຢ່າງຈະແຈ້ງ, ໂຄງການການບິນອະວະກາດທີ່ສຳຄັນໄດ້ດຳເນີນມາເປັນຢ່າງດີ ແລະໄດ້ຮັບໝາກຜົນຢ່າງຫຼວງຫຼາຍ.
ປື້ມປົກຂາວຍັງລະບຸອີກວ່າ: ໃນ 5 ປີຕໍ່ໜ້ານີ້, ຈີນຈະເລັ່ງບາດກ້າວການສ້າງສາປະເທດໃຫຍ່ດ້ານການບິນອະວະກາດໃຫ້ໄວຂຶ້ນ, ຍົກຂີດຄວາມສາມາດພື້ນຖານຂອງອຸດສາຫະກຳການບິນອະວະກາດໃຫ້ສູງຂຶ້ນຢ່າງຕໍ່ເນື່ອງ, ເລັ່ງບຸກທະລຸເຕັກນິກທີ່ສຳຄັນ ແລະ ການຄົ້ນຄວ້າເຕັກນິກທີ່ກ້າວໜ້າທັນສະໄໝ, ຊຸກຍູ້ວິທະຍາສາດອະວະກາດ, ເຕັກນິກອະວະກາດ ແລະ ການປະຍຸກໃຊ້ອະວະກາດໃຫ້ພັດທະນາຢ່າງຮອບດ້ານ.
ປື້ມປົກຂາວຊີ້ໃຫ້ເຫັນອີກວ່າ: ລັດຖະບານຈີນເຫັນວ່າ, ການຊອກຄົ້ນ, ພັດທະນາ ແລະ ປະຍຸກໃຊ້ອະວະກາດຊັ້ນນອກໃນທາງສັນຕິ ແລະ ດາວນອກໂລກ ແມ່ນສິດສະເໝີພາບຂອງບັນດາປະເທດໃນໂລກ. ຂະນະທີ່ການເຄື່ອນໄຫວຕ່າງໆຢູ່ອະວະກາດຂອງປະເທດຕ່າງໆ ຄວນສ້າງຜົນດີຕໍ່ການພັດທະນາເສດຖະກິດແລະຄວາມກ້າວໜ້າຂອງສັງຄົມປະເທດຕ່າງໆ ກໍຄືຕໍ່ສັນຕິພາບ, ຄວາມປອດໄພ, ການດຳລົງຊີວິດ ແລະການພັດທະນາຂອງມວນມະນຸດ.
