ໃນໄລຍະບຸນກຸດຈີນ2017 ທີ່ຈະມາເຖິງໃນມໍ່ໆນີ້, ທ່ານລຽນເວີຍລຽງ ຮອງຫົວໜ້າຄະນະກຳມະການການພັດທະນາແລະປະຕິຮູບແຫ່ງລັດຈີນຢືນຢັນໃນວັນທີ 28 ທັນວານີ້ຢູ່ປັກກິ່ງວ່າ: ຄາດຄະເນໃນເບື້ອງຕົ້ນ, ການຂົນສົ່ງໂດຍສານໃນໄລຍະດັ່ງກ່າວຈະບັນລຸເຖິງ 2 ຕື້ 978 ລ້ານເທື່ອຄົນ ເພີ່ມຂຶ້ນ 2,2% ເມື່ອທຽບໃສ່ໄລຍະດຽວກັນຂອງປີ2016.
ການຂົນສົ່ງໄລຍະບຸນກຸດຈີນ2017 ຈະເລີ່ມຕົ້ນໃນວັນທີ 13 ມັງກອນໜ້ານີ້ແລະຈະດຳເນີນເປັນເວລາ 40 ວັນນັ້ນ, ການຂົນສົ່ງທາງລົດໄຟເປັນສ່ວນສຳຄັນທີ່ສຸດໃນການຂົນສົ່ງໄລຍະບຸນກຸດຈີນທຸກປີ. ທັງນີ້ທ່ານຫຼີເວີນຊິນ ຮອງຜູ້ອຳນວຍການໃຫຍ່ບໍລິສັດທາງລົດໄຟຈີນຢືນຢັນວ່າ ຄາດວ່າໄລຍະຂົນສົ່ງບຸນກຸດຈີນ 2017, ພາກສ່ວນຕົນຈະຂົນສົ່ງໂດຍສານ 352 ລ້ານເທື່ອຄົນ ເພີ່ມຂຶ້ນ 9,7% ເມື່ອທຽບໃສ່ໄລຍະດຽວກັນຂອງປີ2016ໂດຍສະເລ່ຍແລ້ວຈະບັນລຸ 8 ລ້ານ 8 ແສນເທື່ອຄົນຕໍ່ມື້. ປັດຈຸບັນ, ການຈຳໜ່າຍປີ້ລົດໄຟໄດ້ດຳເນີນໄປດ້ວຍດີໂດຍສະເພາະການຈຳໜ່າຍປີ້ລົດໄຟກ່ອນບຸນກຸດຈີນເຊິ່ງເປັນໄລຍະທີ່ມີຄົນຊື້ຫຼາຍທີ່ສຸດກໍດຳເນີນໄປດ້ວຍຄວາມເປັນລະບຽບຮຽບຮ້ອຍ.