ວັນທີ 29 ທັນວານີ້ ຫ້ອງການຖະແຫຼງຂ່າວລັດຖະບານຈີນໄດ້ເຜີຍແຜ່ປຶ້ມປົກຂາວ "ການພັດທະນາລະບົບຄົມມະນາຄົມການຂົນສົ່ງຈີນ"ເຊິ່ງລະບຸວ່າ: ເຕັກນິກກໍ່ສ້າງພື້ນຖານໂຄງລ່າງຂອງຈີນໄດ້ນຳໜ້າໂລກເຊິ່ງເຫັນໄດ້ຈາກເຕັກນິກການກໍ່ສ້າງໄດ້ຮັບການພັດທະນາກ້າວໜ້າຢ່າງວ່ອງໄວ ແລະໄດ້ນຳໃຊ້ເຕັກໂນໂລຊີຂໍ້ມູນຂ່າວສານແລະເຕັກໂນໂລຊີທັນສະໄໝເຂົ້າໃນຂົງເຂດຕ່າງໆຢ່າງກວ້າງຂວາງ.
ປຶ້ມປົກຂາວລະບຸວ່າ: ເຕັກນິກທາງລົດໄຟຄວາມໄວສູງ,ທາງລົດໄຟຢູ່ເຂດອາກາດໜາວແຮງ, ທາງລົດໄຟພູພຽງແລະທາງລົດໄຟບັນທຸກນ້ຳໜັກຂອງຈີນໄດ້ກ້າວສູ່ໃນຖັນແຖວທັນສະໄໝຂອງໂລກ ເຊິ່ງທາງລົດໄຟຄວາມໄວສູງໄດ້ກາຍເປັນນາມບັດຂອງ "ຈີນຜະລິດ"ແລະ "ຂະຫຍາຍຕົວສູ່ຕ່າງປະເທດ". ນອກນີ້, ຈີນຍັງປະສົບຜົນສຳເລັດໃນການສ້າງຂົວແລະອຸມົງໃຫຍ່ລະດັບໂລກຈຳນວນໜຶ່ງ ແລະເຕັກນິກການກໍ່ສ້າງຂົວແລະອຸມົງໃຫຍ່ຂອງຈີນໄດ້ບັນລຸເຖິງລະດັບກ້າວໜ້າຂອງໂລກແລ້ວ.
ປຶ້ມປົກຂາວຍັງລະບຸອີກວ່າ: ຈີນມີຄວາມກ້າວໜ້າຢ່າງວ່ອງໄວໃນດ້ານເຕັກນິກຜະລິດອຸປະກອນໂດຍຕັກນິກການຜະລິດອຸປະກອນທາງລົດໄຟຄຸນນະພາບສູງທີ່ມີສິດຊັບສິນທາງປັນຍາເປັນຂອງຕົນເອງໂດຍສະເພາະລົດໄຟຄວາມໄວສູງ,ຫົວຈັກແມ່ແຮງສູງໄດ້ບັນລຸເຖິງລະດັບກ້າວໜ້າຂອງໂລກ ແລະບາງຢ່າງຍັງ ບັນລຸເຖິງລະດັບນຳໜ້າໂລກອີກດ້ວຍ.