ປະມຸກລັດຈີນ-ຣັດເຊຍສົ່ງໂທລະເລກອວຍພອນປີໃໝ່ແກ່ກັນ

ວັນທີ 31 ທັນວານີ້, ທ່ານສີຈິນຜິງ ປະທານປະເທດຈີນ ແລະທ່ານວຣາດີເມຍປູຕິນ ປະທານາທິບໍດີຣັດເຊຍໄດ້ສົ່ງໂທລະເລກອວຍພອນປີໃໝ່ແກ່ກັນ.

ໃນໂທລະເລກອວຍພອນປີໃໝ່, ທ່ານສີຈິ້ນຜິງໄດ້ຕາງໜ້າໃຫ້ລັດຖະບານແລະປະຊາຊົນຈີນສະແດງຄວາມຊົມເຊີຍທີ່ຈິງໃຈແລະພອນໄຊອັນປະເສີດເຖິງທ່ານປະທານາທິບໍດີປູຕິນແລະປະຊາຊົນຣັດເຊຍທັງຢືນຢັນວ່າ ປີ 2016, ສອງຝ່າຍໄດ້ກຳແໜ້ນໂອກາດສະເຫຼີມສະຫຼອງການເຊັນສົນທິສັນຍາການຮ່ວມມືແລະມິດຕະພາບຖານບ້ານໃກ້ເຮືອນຄຽງຈີນ-ຣັດເຊຍຄົບຮອບ 15 ປີແລະການສ້າງຕັ້ງສາຍພົວພັນຄູ່ປະສານງານຍຸດທະສາດຈີນ-ຣັດເຊຍຄົບຮອບ 20 ປີ ເພື່ອສົ່ງເສີມທັດສະນະຄະຕິທີ່ໃຫ້ສອງປະເທດແລະປະຊາຊົນສອງຊາດມີມິດຕະພາບຕໍ່ກັນທຸກເຊັ່ນຄົນແລະເພີ່ມທະວີການແລກປ່ຽນແລະຮ່ວມມືໃນຂົງເຂດຕ່າງໆ,ປະສານສົມທົບກັນໃນວຽກງານສາກົນ ແລະນຳພາສາຍພົວພັນລະຫວ່າງສອງປະເທດໃຫ້ຂະຫຍາຍຕົວໄດ້ຮັບຜົນສຳເລັດໃໝ່ຢ່າງອຸດົມສົມບູນ.

ໃນໂທລະເລກອວຍພອນ, ທ່ານປູຕິນໄດ້ອວຍພອນປີໃໝ່ສາກົນແລະບຸນກຸດຈີນຕໍ່ທ່ານປະທານສີຈິ້ນຜິງ ແລະອວຍພອນປະຊາຊົນຈີນທົ່ວທັງຊາດຈົ່ງຢູ່ເຢັນເປັນສຸກທັງຢືນຢັນວ່າ ປີ 2016, ສອງປະເທດໄດ້ປະສານງານກັນຢ່າງມີປະສິດທິຜົນດັ່ງທີ່ໄດ້ປະຕິບັດຜ່ານມາໂດຍສອງຝ່າຍໄດ້ປະສົບຜົນສຳເລັດໃນການຈັດຕັ້ງປະຕິບັດແຜນງານທີ 3 ກ່ຽວກັບການປະຕິບັດສົນທິສັນຍາການຮ່ວມມືແລະມິດຕະພາບຖານບ້ານໃກ້ເຮືອນຄຽງຣັດເຊຍ-ຈີນ ແລະປະສານສົມທົບກັນໃນການຊຸກຍູ້ການແກ້ໄຂບັນຫາສຳຄັນໃນທົ່ວໂລກແລະພາກພື້ນຢ່າງມີປະສິດທິຜົນ. ແນວໃດກໍດີ, ເຊື່ອໝັ້ນວ່າ ໃນປີໃໝ່ທີ່ຈະມາເຖິງ, ສາຍພົວພັນຄູ່ປະສານງານຍຸດທະສາດຮອບດ້ານຣັດເຊຍ-ຈີນຈະມີການພັດທະນາຢ່າງເຂັ້ມແຂງກວ່າເກົ່າແລະສ້າງຄວາມຜາສຸກໃຫ້ແກ່ປະຊາຊົນສອງຊາດ ທັງປະກອບສ່ວນເຂົ້າໃນການເພີ່ມທະວີຄວາມໝັ້ນຄົງແລະສະຖຽນລະພາບຂອງໂລກຕື່ມອີກ.