ວັນທີ 1 ມັງກອນນີ້, ທ່ານສີຈິ້ນຜີງ ປະທານປະເທດຈີນໄດ້ສົ່ງຈົດໝາຍໄປຍັງທ່ານວຼາຕີເມຍ ປູຕີນ ປະທານາທິບໍດີຣັດເຊຍ, ທ່ານແຈຄົບ ຈູມາ ປະທານາທິບໍດີອາຟຼີກາໃຕ້, ທ່ານມາເຊວ ເທິມີວ ປະທານາທິບໍດີແບຼຊິນ, ແລະທ່ານນາເຣີນດຼາ ໂມຕີ ປະທານາທິບໍດີອິນເດຍກ່ຽວກັບຈີນເຂົ້າຮັບຕຳແໜ່ງປະເທດປະທານກຸ່ມ BRICS ແລະແນະນຳແນວຄວາມຄຶດຂອງຈີນໃນການຊຸກຍູ້ຂະບວນການຮ່ວມມືລະຫວ່າງປະເທດກຸ່ມ BRICS ໃນໄລຍະດຳລົງຕຳແໜ່ງເປັນປະເທດປະທານ.
ທ່ານສີຈິ້ນຜີງຊີ້ອອກວ່າ, ຈີນຈະຈັດການພົບປະຄັ້ງທີ 9 ຂອງຜູ້ນຳປະເທກກຸ່ມ BRICS ຢູ່ນະຄອນເຊ້ຍເມີນແຂວງຟູຈ້ຽນຈີນໃນເດືອນກັນຍາປີ 2017. ພາຍໃຕ້ຄວາມພະຍາຍາມຮ່ວມຂອງບັນດາປະເທດສະມາຊິກ, ການຮ່ວມມືລະຫວ່າງປະເທດກຸ່ມ BRICS ໄດ້ຜ່ານເວລາ 10 ປີທຳອິດຢ່າງສຳເລັດຜົນ, ທັງໄດ້ຮັບໝາກຜົນອັນອຸດົມສົມບູນໃນຂົງເຂດການເມືອງ ເສດຖະກິດ ວັດທະນະທຳມະນຸດແລະອື່ນໆ. ປີ2017ນີ້, ປະເທດກຸ່ມ BRICS ຈະດຳເນີນການຮ່ວມມື 10 ປີທີສອງ. ການຮ່ວມມືລະຫວ່າງກຸ່ມ BRICS ໃນຕໍ່ໜ້ານີ້ຈະໄດ້ຂະຫຍາຍຕົວຫຼາຍກວ່າເກົ່າ, ແລະກໍຈະເສີມຂະຫຍາຍບົດບາດຍິ່ງໃຫຍ່ກວ່າເກົ່າໃນວຽກງານສາກົນ. ໃນຖານະເປັນປະເທດປະທານກຸ່ມ BRICS ໃນປີ 2017, ຈີນຄອງຄອຍພ້ອມກັບບັນດາປະເທດສະມາຊິກ, ໝູນອ້ອມຫົວຂໍ້ "ລົງເລິກການພົວພັນຄູ່ຮ່ວມມືຂອງກຸ່ມ BRICS ,ບຸກເບີກອະນາຄົດທີ່ສະຫວ່າງສະໄຫວກວ່າເກົ່າ", ເຕົ້າໂຮມຄວາມຮັບຮູ້ຄືກັນໃນການຮ່ວມມື, ວາດແຜນຜັງການຮ່ວມມື. ຕໍ່ເລື່ອງນີ້, ຫວັງວ່າ ການພົບປະກັນຢູ່ນະຄອນເຊ້ຍເມີນ ຈະສຸມໃສ່ຄວາມຄືບໜ້າໃນດ້ານດັ່ງຕໍ່ໄປນີ້: ໜຶ່ງ, ລົງເລິກການຮ່ວມມືທີ່ຕິດແທດຕົວຈິງ, ຊຸກຍູ້ໃຫ້ພັດທະນາຮ່ວມກັນ; ສອງ ເພີ່ມທະວີການຄຸ້ມຄອງທົ່ວໂລກ, ຮ່ວມກັນຮັບມືກັບການທ້າທາຍ; ສາມ ດຳເນີນການແລກປ່ຽນກັນດ້ານວັດທະນະທຳມະນຸດ, ຮັດແໜ້ນພື້ນຖານຂອງປະຊາຊົນ; ສີ່ ຊຸກຍູ້ການສ້າງສາກົນໄກ, ສ້າງການພົວພັນຄູ່ຮ່ວມມືອັນກວ້າງຂວາງກວ່າເກົ່າ. ຈີນຈະຍຶດໝັ້ນນ້ຳໃຈຂອງກຸ່ມ BRICS ທີ່ເປີດປະຕູ ແລະຮ່ວມມືກັນຕ່າງຝ່າຍຕ່າງມີຜົນປະໂຫຍດ, ຮ່ວມກັນກັບບັນດາປະເທດສະມາຊິກ, ຊຸກຍູ້ໃຫ້ການພົບປະກັນທີ່ເຊ້ຍເມີນໄດ້ຮັບຜົນສຳເລັດ, ຊຸກຍູ້ໃຫ້ການຮ່ວມມືໃນກຸ່ມ BRICS ໄດ້ກ້າວຂຶ້ນສູ່ລະດັບໃໝ່.