(ທ່ານວາງເກິ່ງນຽນ ຜູ້ອຳນວຍການໃຫຍ່ CRI ກ່າວຄຳອວຍພອນປີໃໝ່ຕໍ່ເພື່ອນຜູ້ຕິດຕາມ)
ເນື່ອງໃນໂອກາດປີໃໝ່ 2017 ໄດ້ວຽນມາເຖິງ, ທ່ານ ວາງເກິ່ງນຽນ ຜູ້ອຳນວຍການໃຫຍ່ວິທະຍຸສາກົນແຫ່ງປະເທດຈີນ ຫຼື CRI ໄດ້ຕາງໜ້າພະນັກງານຂອງ CRI ສະແດງຄວາມຢື້ຢາມຖາມຂ່າວແລະຄວາມອວຍພອນຢ່າງຈິງໃຈຕໍ່ເພື່ອນຜູ້ຕິດຕາມຢູ່ຕ່າງປະເທດໂດຍຜ່ານຄື້ນວິທະຍຸແລະອິນເຕີເນັດ ໂດຍກ່າວວ່າ: ປີ 2017 ແມ່ນປີໄກ່ຕາມຈັນທະຄະຕິຈີນ, ສຳລັບ CRI ທີ່ມີປະຫວັດສາດ 75 ມາແລ້ວ, ປີໃໝ່ໝາຍເຖິງການກ້າວເດີນໃໝ່. ພວກເຮົາຈະເຮັດເໝືອນດັ່ງຜ່ານມາ, ພະຍາຍາມຍົກຄວາມສາມາດໃນການເຜີຍແຜ່ແລະລະດັບການບໍລິການຂໍ້ມູນຂ່າວສານໃຫ້ສູງຂຶ້ນເພື່ອເຮັດໃຫ້ເພື່ອນມິດທັງຫຼາຍຮູ້ປະເທດຈີນ, ເຂົ້າໃຈປະເທດຈີນ ແລະມັກຮັກປະເທດຈີນຫຼາຍກວ່າເກົ່າ. ຕໍ່ໄປ ເຊີນຟັງຄຳອວຍພອນປີໃໝ່ 2017 ຂອງທ່ານ ວາງເກິ່ງນຽນ.
ເພື່ອນມິດທີ່ຮັກແພງທັງຫຼາຍ:
ເນື່ອງໃນວາລະດິຖີສົ່ງທ້າຍປີເກົ່າຕ້ອນຮັບປີໃໝ່, ຂ້າພະເຈົ້າຂໍຕາງໜ້າວິທະຍຸສາກົນແຫ່ງປະເທດຈີນ ແລະສະຖານີວິທະຍຸໂທລະພາບອິນເຕີເນັດສາກົນຈີນ ແລະໃນນາມສ່ວນຕົວ ສະແດງຄວາມຢື້ຢາມຖາມຂ່າວແລະອວຍພອນປີໃໝ່ຕໍ່ບັນດາທ່ານ, ຂໍອວຍພອນໃຫ້ເພື່ອນມິດທັງຫຼາຍຈົ່ງມີແຕ່ຄວາມສຸກໃນຊີວິດ ແລະປະສົບຜົນສຳເລັດໃນໜ້າທີ່ວຽກງານທຸກປະການ.
ກ່ອນໜ້ານີ້ບໍ່ດົນ, CRI ໄດ້ສະຫຼອງວັນເກີດ 75 ປີ, ເພື່ອນຜູ້ຟັງ ແລະຜູ້ຕິດຕາມເວັບໄຊຂອງ CRI ຢູ່ຕ່າງປະເທດເປັນຈຳນວນຫຼາຍຕ່າງກໍສົ່ງຄຳອວຍພອນ ເປັນຕົ້ນທ່ານ ຣາວີຈັນດຣານ ຜູ້ໃຊ້ອິນເຕີເນັດຈາກອິນເດຍໄດ້ໂພສຢູ່ເວັບໄຊສັງຄົມອອນໄລວ່າ: "ຈາກວິທະຍຸຄື້ນສັ້ນເຖິງເວັບໄຊ ແລ້ວກ້າວສູ່ສື່ສັງຄົມອອນໄລ ແລະ APP, CRIໄດ້ຕິດຕາມຂ້າພະເຈົ້າ, ຫວັງວ່າພວກທ່ານຈະຈັດທຳລາຍການນັບມື້ນັບດີຂຶ້ນ. ສຸກສັນວັນເກີດ." ຄຳອວຍພອນສັ້ນໆ ທີ່ອອກມາຈາກຈິງໃຈຂອງເພື່ອນມິດຫຼວງຫຼາຍ ທັງໄດ້ວາດພາບຈັງຫວະກ້າວເດີນຕາມຍຸກສະໄໝຂອງ CRI. ເພື່ອນມິດທີ່ຮັກແພງ, ຍ້ອນບັນດາທ່ານທີ່ໃຫ້ກຳລັງໃຈແລະເອົາໃຈໃສ່, ພວກຂ້າພະເຈົ້າຈຶ່ງມີພະລັງທີ່ແຮງກ້າທີ່ໃນການກ້າວໄປໜ້າຢ່າງບໍ່ຢຸດຢັ້ງ. ການເຕີບໃຫຍ່ຂະຫຍາຍຕົວຂອງ CRI ຈະປາສະຈາກການສະໜັບສະໜູນຢ່າງແຂງແຮງຂອງເພື່ອນມິດທີ່ມະຫາສານຈາກປະເທດຕ່າງໆໃນໂລກບໍ່ໄດ້ ແລະນະທີ່ນີ້, ຂ້າພະເຈົ້າຂໍສະແດງຄວາມຂອບໃຈບັນດາທ່ານດ້ວຍຄວາມຈິງໃຈ."
ປີ 2016, ໂລກໄດ້ມາເຖິງທາງຜ່ານທີ່ສຳຄັນອີກ ແລະ ຈີນກໍໄດ້ເສີມຂະຫຍາຍບົດບາດຂອງຕົນຢ່າງຕັ້ງໜ້າ ໂດຍໄດ້ປະກອບສ່ວນດ້ວຍສະຕິປັນຍາຂອງຕົນເພື່ອການປົກຄອງທົ່ວໂລກໃນກອງປະຊຸມສຸດຍອດ G20 ຫັງໂຈ່ວ, ຂະນະທີ່ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ກໍໄດ້ຮັບຄວາມເຫັນດີເຫັນພ້ອມນັບມື້ຫຼາຍຂຶ້ນ. ຢູ່ບົນເວທີສາກົນ, ຈີນໄດ້ສະແດງໃຫ້ເຫັນເຖິງການເປັນປະເທດໃຫຍ່ທີ່ມີຄວາມຮັບຜິດຊອບ.
ການພັດທະນາຂອງຈີນໄດ້ຮັບຄວາມສົນໃຈຈາກທົ່ວໂລກ ແລະ ຈີນ "ມາແຕ່ໃສ ແລະຈະກ້າວເດີນໄປທາງໃດ" ກໍໄດ້ກາຍເປັນຈຸດສຸມຂອງໂລກແລ້ວ. ພວກຂ້າພະເຈົ້າເປັນເຈົ້າໃນການເຊື່ອມໂຍງລະຫວ່າງຈີນແລະພາຍນອກ ເພື່ອໃຫ້ໂລກຮູ້ຈັກຈີນ. ໃນໜຶ່ງປີຜ່ານມາ, CRI ໄດ້ລົງເລິກການຫຼອມລວມແລະຫັນປ່ຽນຮູບແບບຂອງສື່ ໂດຍໄດ້ເລັ່ງສົ່ງເສີມການຮ່ວມມືກັບສື່ຕ່າງປະເທດໃຫ້ເລັ່ງຂຶ້ນ ແລະ ໄດ້ໂຄສະນາປະເທດຈີນທີ່ໜ້າປະທັບໃຈໃຫ້ເພື່ອນມິດໄດ້ຮັບຟັງຫຼາຍເລື່ອງແລະຕໍ່ເນື່ອງ. ທ່ານສີຈິ້ນຜິງ ປະທານປະເທດຈີນ ແລະ ຜູ້ນຳຂອງ 3 ປະເທດ ຄື ຣັດເຊຍ, ແຊກບີ ແລະ ບັງກລາເດັດ ໄດ້ຮ່ວມເປັນສັກຂີພິຍານໃນການເຊັນສັນຍາຮ່ວມມືລະຫວ່າງ CRI ກັບສື່ຂອງ 3 ປະເທດດັ່ງກ່າວ. ຂະນະທີ່ການລາຍງານເຫດການສຳຄັນຕ່າງໆ ເຊັ່ນ ກອງປະຊຸມສຸດຍອດ G20 ຫັງໂຈ່ວ, ການສົ່ງຍານອະວະກາດທ່ຽນກົ່ງ 2 ແລະຍານອະວະກາດບັນທຸກມະນຸດເສີນໂຈ່ວ 11 ແລະອື່ນໆ ຂອງພວກຂ້າພະເຈົ້າ ກໍໄດ້ຮັບຄວາມສົນໃຈ ແລະ ໄດ້ຮັບການຢືນຢັນຢ່າງເຕັມສ່ວນຈາກເພື່ອນມິດທັງຫຼາຍ. ນອກນີ້, ພວກຂ້າພະເຈົ້າຍັງໄດ້ພະຍາຍາມເຊື່ອມຕໍ່ກັບພາຍນອກ ໂດຍໄດ້ຕັ້ງໜ້າພັດທະນາ 3 ສື່ເຄື່ອນທີ່ຫຼາຍພາສາທີ່ຫັນໜ້າສູ່ໂລກ ຄື China News, China Radio ແລະ China TV ທັງຍັງໄດ້ວາງແຜນ ພັດທະນາ APP ເປັນຫຼາຍພາສາ ເປັນຕົ້ນ ຈີນ-ອັງກິດ, ຈີນ-ຣັດເຊຍ, ຈີນ-ອີຕາລີ, ຈີນ-ຍີ່ປຸ່ນ ແລະ ຈີນ-ອິນເດຍ. ນອກນີ້, ໂຄງການສື່ໃໝ່ ເປັນຕົ້ນ ການສືບຕໍ່ກິດຈະການຂອງ Maker ແລະ The Danube Project ເປັນຕົ້ນໄດ້ດຶງດູດເພື່ອນຜູ້ຕິດຕາມ CRI ຈາກຫຼາຍປະເທດເຂົ້າຮ່ວມ. ພວກຂ້າພະເຈົ້າໄດ້ຕັ້ງໜ້າພົວພັນກັບໂລກ ໂດຍຈັດບັນດາກິດຈະກຳທີ່ມີສີສັນຂອງສື່ ເຊັ່ນ ກິດຈະກຳສື່ເຄື່ອນໄຫວເອົາຂ່າວ "ເສັ້ນທາງສາຍໄໝຈີນ-ຣັດເຊຍ" ຢູ່ຈີນ, ກອງປະຊຸມໂຕະມົນຜູ້ນຳຂອງສື່ ເວທີປຶກສາຫາລືອາຊີໂປອາວ, ງານແຂ່ງຂັນຮ້ອງເພງມິດຕະພາບຈີນ-ອາຊຽນ 2016 ແລະ ກອງປະຊຸມສົນທະນາລະຫວ່າງນັກສຶກສາຈີນ-ອາເມລິກາ ກໍໄດ້ຮັບຄວາມສົນໃຈເປັນຢ່າງຍິ່ງ.
ຄວາມພະຍາຍາມຢູ່ໃສ,ຄວາມສຳເລັດຢູ່ຫັ້ນ. ປີ2016, ພວກຂ້າພະເຈົ້າໄດ້ປະສົບຜົນສຳເລັດຢ່າງຫຼວງຫຼາຍໂດຍຍອດເພື່ອນຜູ້ຕິດຕາມ ທີ່ມີສ່ວນຮ່ວມ CRIມີຫຼາຍກວ່າ 55 ລ້ານ 3 ແສນຄົນ,ສະໂມສອນເພື່ອນຜູ້ຕິດຕາມCRIບັນລຸເຖິງ 4115 ແຫ່ງ, ຍອດຜູ້ໃຊ້APPຕ່າງໆຂອງCRIບັນລຸເຖິງ 260 ລ້ານເລກໝາຍ, ເພື່ອນສື່ສັງຄົມອ໋ອນລາຍຫຼາຍກວ່າ 80 ລ້ານຄົນ. ຄວາມຈິງແລ້ວ, ພວກທ່ານບໍ່ພຽງແຕ່ເປັນໜຶ່ງໃນຕົວເລກໃຫຍ່ເຫຼົ່ານີ້ເທົ່ານັ້ນ, ຫາກພວກທ່ານຍິ່ງແມ່ນເພື່ອນມິດຂອງCRI.
ຄືດັ່ງນາງ Valentina Nikolova ເພື່ອນມິດທາງອິນເຕີເນັດຈາກປະເທດບຸນກາລີໄດ້ສະແດງຄຳເຫັນໃນສື່ສັງຄົມອ໋ອນລ່າຍວ່າ: "CRIໄດ້ເພີ່ມປີກແຫ່ງຄວາມໄຝ່ຝັນໃຫ້ທ່ານ, CRIເຮັດໃຫ້ທ່ານຮູ້ສຶກເຖິງຄວາມດີງາມຂອງຈີນທັງເຮັດໃຫ້ທ່ານມີຄວາມຮັບຮູ້ເລິກເຊິ່ງກວ່າເກົ່າກ່ຽວກັບພະລັງແຫ່ງມິດຕະພາບ, ຂໍຂອບໃຈ ເພື່ອນມິດທັງຫຼາຍຈາກປະເທດຈີນທີ່ຢູ່ແສນໄກ!" ຄຳເຫຼົ່ານີ້ກໍເໝືອນດັ່ງຄຳໃຫ້ກຳລັງໃຈດ້ວຍຄວາມຈິງໃຈຈາກເພື່ອນເກົ່າຜູ້ໜຶ່ງ ເຮັດໃຫ້CRIຈະບໍ່ຫຼົງລືມອຸດົມການແຕ່ຫົວທີ, ບາກບັ່ນສູ້ຊົນກ້າວໜ້າຕໍ່ໄປພ້ອມກັບຄວາມໄຝ່ຝັນ.
ປີໜ້າເປັນປີລະກາຕາມຈັນທະຄະຕິຈີນ. ໄກ່ຄຳຂັນກ່ອນອາລຸນວັນໃໝ່ມາເຖິງ, ການອອກແຮງໄດ້ເລີ່ມໃໝ່. ສຳລັບCRIທີ່ມີປະຫວັດ 75 ປີແລ້ວນັ້ນ, ປີໃໝ່ໝາຍເຖິງການກ້າວເດີນໃໝ່, CRIຈະພະຍາຍາມສູ້ຊົນຍົກຄວາມສາມາດການເຜີຍແຜ່ຂໍ້ມູນຂ່າວສານແລະຍົກລະດັບການບໍລິການຄືທີ່ໄດ້ພະຍາຍາມຜ່ານມາໃຫ້ສູງຂຶ້ນເພື່ອເຮັດໃຫ້ເພື່ອນມິດທັງຫຼາຍຮູ້ຈີນ, ເຂົ້າໃຈຈີນແລະມັກຮັກຈີນຫຼາຍກວ່າເກົ່າ.
ຂໍສົ່ງພອນປີໃໝ່ເຖິງເພື່ອນມິດຕິດຕາມCRIທຸກໆທ່ານອີກເທື່ອໃໝ່ດ້ວຍຄວາມຈິງໃຈ, ຂໍຂອບໃຈ!
