ເນື່ອງໃນໂອກາດປີໃໝ່2017ມາເຖິງນີ້,ທ່ານສີຈິ້ນຜີງ, ປະທານປະເທດຈີນໄດ້ກ່າວຄຳອວຍພອນປີໃໝ່. ຫຼັງຈາກນັ້ນ, ບຸກຄົນວົງການຕ່າງໆຂອງປະຊາຄົມໂລກໄດ້ພາກັນສະແດງຄວາມຊົມເຊີຍ, ແລະກ່າວວ່າເນື້ອໃນຄຳອວຍພອນໄດ້ສຸມໃສ່ບັນຫາຊີວິດການເປັນຢູ່ຂອງປະຊາຊົນ,ສ້າງຄວາມອົບອຸ່ນໃຫ້ແກ່ປະຊາຊົນ,ເນັ້ນຄວາມຕັດສິນໃຈທີ່ຈີນຈະຮ່ວມກັບບັນດາປະເທດໃນໂລກພັດທະນາພ້ອມກັນ, ເຊິ່ງສະແດງໃຫ້ເຫັນຄວາມໝັ້ນໃຈແລະສະຕິຮັບຜິດຊອບຂອງຈີນທີ່ເປັນປະເທດໃຫຍ່.
ທ່ານຣອນເນຍ ລິນສ໌,ຊ່ຽວຊານຄົ້ນຄວ້າຈີນຂອງເບຼຊິນກ່າວວ່າ, ປີ2016ລັດຖະບານຈີນພະຍາຍາມຊຸກຍູ້ການປະຕິຮູບ, ໄດ້ຮັບຄວາມຄືບໜ້າອັນສຳຄັນໃນຂົງເຂດສາທາລະນະສຸກ,ການສຶກສາ,ເຮືອນຢູ່,ຕຸລາການແລະອື່ນໆ. "10ລ້ານກວ່າຄົນພົ້ນອອກຈາກຄວາມທຸກຍາກ"ເປັນຄວາມກ້າວໜ້າອັນຍິ່ງໃຫຍ່ໂດຍບໍ່ຕ້ອງສົງໄສ. ການລົບລ້າງຄວາມທຸກຍາກເປັນພາລະໜ້າທີ່ອັນສຳຄັນຂອງສັງຄົມມະນຸດ, ແຕ່ມັນບໍ່ແມ່ນໜ້າທີ່ທີ່ສາມາດສຳເລັດໄດ້ງ່າຍ.ລັດຖະບານຈີນໄດ້ທຳຄວາມພະຍາຍາມອັນໃຫຍ່ຫຼວງໃນຂົງເຂດຫຼຸດຜ່ອນຄວາມທຸກຍາກ, ໄດ້ຮັບຜົນງານອັນແທ້ຈິງໃນທຸກປີ, ເບຼຊິນແລະປະເທດອື່ນໆສາມາດຖອດຖອນເອົາບົດຮຽນຂອງຈີນ.
ທ່ານລີຈ້ຽນຊົງ, ທີ່ປຶກສາຊັ້ນສູຂອງປະທານສະພາການຄ້າຈີນ-ອາຊຽນກ່າວວ່າ, ຫຼັງຈາກເຂົ້າສູ່ປີ2017, ປັດໄຈທີ່ບໍ່ແນ່ນອນໃນໂລກເພີ່ມຂຶ້ນ, ຄຳອວຍພອນປີໃໝ່ຂອງທ່ານປະທານສີຈິ້ນຜີງໄດ້ເປີດເຜີຍສັນຍານທີ່ສຳຄັນ,ຄື:ຈີນບໍ່ພຽງແຕ່ສຸມໃສ່ການພັດທະນາຂອງຕົນເທົ່ານັ້ນ, ແຕ່ຍັງຄຳນຶງເຖິງແລະເອົາໃຈໃສ່ການພັດທະນາຂອງປະເທດແລະເຂດແຄວ້ນອື່ນ, ນີ້ມີຄວາມສຳຄັນຫຼາຍ.
ທ່ານອາມັດ ວາລີ,ຮອງປະທານສະມາຄົມມິດຕະພາບເອຢິບ-ຈີນກ່າວວ່າ, ທ່ານປະທານສີຈິ້ນຜີງໄດ້ກ່າວເຖິງ "ການສ້າງ 'ໜຶ່ງແລວທາງໜຶ່ງເສັ້ນທາງ'ໄດ້ກ້າວໜ້າຢ່າງວ່ອງໄວ",ປະຊາຊົນເອຢິບມີຄວາມປາຖະໜາເປັນຢ່າງສູງຕໍ່ການສ້າງ"ໜຶ່ງແລວທາງໜຶ່ງເສັ້ນທາງ", ເຊື່ອໝັ້ນວ່າຈະນຳເອົາໂອກາດອັນໃຫຍ່ຫຼວງໃຫ້ແກ່ການພັດທະນາເສດຖະກິດຂອງປະເທດລຽບຕາມແລວທາງ.
 |
