ຫວ່າງມໍ່ໆມານີ້, ພາຍໃຕ້ການຈັດຕັ້ງແລະບັນຊາຂອງກະຊວງປ້ອງກັນຄວາມສະຫງົບຈີນ, ຜູ້ຕ້ອງສົງໄສການຫຼອກລວງທາງເຄືອຂ່າຍໂທລະຄົມ 5 ຄົນ ລວມທັງຄົນແຜ່ນດິນໃຫຍ່ຈີນໜຶ່ງຄົນ ແລະ ຄົນໄຕ້ຫວັນຈີນ 4 ຄົນ ໄດ້ຖືກຄຸມຕົວຈາກຫວຽດນາມຜ່ານດ່ານມິດຕະພາບເຂດກວາງຊີກັບຄືນຈີນ.
ຂ່າວແຈ້ງວ່າ, ເດືອນທັນວາປີຜ່ານມາ, ພາກສ່ວນປ້ອງກັນຄວາມສະຫງົບຈີນໄດ້ສືບສວນ-ສອບສວນພົບວ່າ ຜູ້ຕ້ອງສົງໄສໄດ້ຕັ້ງຈຸດເຄື່ອນໄຫວຢູ່ຫວຽດນາມ ແລະ ດຳເນີນການຫຼອກລວງປະຊາຊົນແຂວງຕ່າງໆຂອງຈີນ ເຊັ່ນ ແຂວງເຈີ້ຈ່ຽງ ຜ່ານທາງເຄືອຂ່າຍໂທລະຄົມ. ຈາກນັ້ນ, ດ້ວຍການຊ່ວຍເຫຼືອຈາກສະຖານທູດຈີນປະຈຳຫວຽດນາມ ກໍສາມາດເລີກຮື້ຈຸດເຄື່ອນໄຫວຫຼອກລວງໜຶ່ງຈຸດຢູ່ເມືອງຮາຍຟອງ ສສ ຫວຽດນາມຫວ່າງມໍ່ໆນີ້ ແລະ ສາມາດຈັບຜູ້ຕ້ອງສົງໄສໄດ້ 5 ຄົນ. ຜ່ານການກວດສອບເບື້ອງຕົ້ນພົບວ່າ ຜູ້ຕ້ອງສົງໄສໄດ້ກ່ຽວພັນເຖິງຄະດີຫຼອກລວງ 27 ຄະດີແລະເງິນທຶນ 1 ລ້ານ 3 ແສນ 3 ໝື່ນກວ່າຢວນ.
ເນື່ອງຈາກຜູ້ຖືກຫຼອກລວງລ້ວນແຕ່ແມ່ນຄົນແຜ່ນດິນໃຫຍ່ຈີນ ໂດຍອີງຕາມບົດບັນທຶກຄວາມເຂົ້າໃຈລະຫວ່າງຈີນ-ຫວຽດນາມກ່ຽວກັບການຮ່ວມມືເພື່ອປາບປາມການກະທຳຫຼອກລວງທາງເຄືອຂ່າຍໂທລະຄົມ ແລະດ້ວຍຄວາມຊ່ວຍເຫຼືອຈາກເຈົ້າໜ້າທີ່ຕຳຫຼວດຫວຽດນາມ ຈີນຈຶ່ງສາມາດຄຸມຕົວຜູ້ຕ້ອງສົງໄສ 5 ຄົນດັ່ງກ່າວກັບຄືນປະເທດເພື່ອດຳເນີນຄະດີຕາມກົດໝາຍຂອງແຜ່ນດິນໃຫຍ່ຈີນ.