ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນ ໄດ້ສົນທະນາທາງໂທລະສັບກັບທ່ານ ຈອນ ເຄຣີ ລັດຖະມົນຕີກະຊວງການຕ່າງປະເທດອາເມລິກາໃນວັນທີ 5 ມັງກອນນີ້.
ໂອກາດນີ້, ທ່ານເຄຣີ ກ່າວວ່າ: ໃນຊຸມປີຜ່ານມາ, ສາຍພົວພັນລະຫວ່າງອາເມລິກາ-ຈີນໄດ້ພັດທະນາຢ່າງຮອບດ້ານ ແລະ ໄດ້ຮັບໝາກຜົນຢ່າງຫຼວງຫຼາຍ. ຂະນະທີ່ສອງຝ່າຍໄດ້ຮັກສາການຮ່ວມມືຢ່າງແໜ້ນແຟ້ນໃນການຊຸກຍູ້ໃຫ້ເສດຖະກິດໂລກຟື້ນຕົວ, ການຮັບມືກັບການປ່ຽນແປງຂອງດິນຟ້າອາກາດ, ການແກ້ໄຂບັນຫາດ້ານຄວາມໝັ້ນຄົງສາກົນ ແລະອື່ນໆ. ທ່ານເຄຣີ ກ່າວຢ້ຳວ່າ: ສາຍພົວພັນລະຫວ່າງສອງປະເທດສຳຄັນຫຼາຍ, ການຍຶດໝັ້ນນະໂຍບາຍປະເທດຈີນດຽວບົນພື້ນຖານຖະແຫຼງການຮ່ວມ 3 ສະບັບຂອງສອງຝ່າຍນັ້ນ ແມ່ນຫຼັກໝັ້ນຮ່ວມຂອງສອງພັກຂອງອາເມລິກາ ຄື ຣີພັບບຣີກັນ ແລະ ດີໂມແກຼດ.
ທ່ານຫວາງຢີ້ ກ່າວວ່າ: ສາຍພົວພັນລະຫວ່າງຈີນ-ອາເມລິກາພວມຢູ່ໃນໄລຍະທີ່ສືບຕໍ່ເສີມຂະຫຍາຍທັງອັນເກົ່າແລະໃໝ່, ໝາກຜົນການຮ່ວມມືລະຫວ່າງສອງປະເທດໄດ້ມາບໍ່ແມ່ນງ່າຍ, ຫວັງວ່າສອງຝ່າຍຈະຮ່ວມກັນຮັກສາການຮ່ວມມືເປັນຢ່າງດີ ແລະ ກຳທິດທາງແຫ່ງການພັດທະນາສາຍພົວພັນລະຫວ່າງສອງປະເທດໃຫ້ຖືກຕ້ອງ.
ນອກນີ້, ສອງຝ່າຍຍັງໄດ້ແລກປ່ຽນຄວາມເຫັນກ່ຽວກັບບັນຫາສາກົນແລະພາກພື້ນທີ່ສອງຝ່າຍສົນໃຈຮ່ວມກັນ.