ວັນທີ 6 ມັງກອນນີ້, ອົງການຕໍ່ຕ້ານຢາເສບຕິດຂອງຟີລິບປິນກ່າວວ່າ: ພາຍໃຕ້ການຊີ້ນຳຂອງນະໂຍບາຍຕໍ່ຕ້ານຢາເສບຕິດຢ່າງເຂັ້ມແຂງຂອງທ່ານປະທານາທິບໍດີ ໂຣດຣີໂກ ດູເຕີແຕ, ປີ 2016 ລັດຖະບານປະເທດຕົນຍຶດໄດ້ຢາເສບຕິດແລະເຄມີທີ່ສາມາດຜະລິດເປັນພັນຢາເສບຕິດທີ່ມີມູນຄ່າເຖິງ 18 ຕື້ 270 ລ້ານເປໂຊ (ປະມານ 2 ຕື້ 540 ລ້ານໂດລາສະຫະລັດ), ເພີ່ມຂຶ້ນ 238% ເມື່ອທຽບໃສ່ປີ 2015.
ໃນວັນດັ່ງກ່າວ, ອົງການຕໍ່ຕ້ານຢາເສບຕິດຂອງຟີລິບປິນໄດ້ອອກຖະແຫຼງການສະບັບໜຶ່ງຕໍ່ສື່ມວນຊົນໂດຍກ່າວວ່າ: ໃນປີ 2016, ລັດຖະບານຈັບໄດ້ຜູ້ຕ້ອງສົງໄສຈຳນວນ 27.962 ຄົນ, ເພີ່ມຂຶ້ນ 44% ເມື່ອທຽບໃສ່ປີ 2015.
ຖະແຫຼງການຂຽນວ່າ: ປີ 2016, ພາຍໃຕ້ການປະສານສົມທົບຂອງພາກສ່ວນທີ່ກ່ຽວຂ້ອງອື່ນໆຂອງລັດຖະບານ, ອົງການຕໍ່ຕ້ານຢາເສບຕິດໄດ້ປະຕິບັດການເຄື່ອນໄຫວຕໍ່ຕ້ານຢາເສບຕິດທັງໝົດ 32.245 ເທື່ອ, ເພີ່ມຂຶ້ນ 29% ເມື່ອທຽບໃສ່ປີ 2015; ຍຶດໄດ້ຢາເສບຕິດ ice 2.495 ກິໂລ ເຊິ່ງເປັນ 4 ເທົ່າຂອງປີ 2015.
ນອກນີ້,ສື່ມວນຊົນທ້ອງຖິ່ນຂອງຟີລິບປິນລາຍງານວ່າ: ໄດ້ມີຜູ້ຕິດຢາເສບຕິດແລະຜູ້ຄ້າຂາຍຢາເສບຕິດຫຼາຍກວ່າ 1 ລ້ານຄົນເຂົ້າມອບຕົວຢູ່ກົມຕຳຫຼວດແລ້ວ, ສ່ວນຜູ້ທີ່ມີສ່ວນກ່ຽວຂ້ອງກັບຢາເສບຕິດຫຼາຍກວ່າ 2 ພັນຄົນຖືກຕຳຫຼວດຍິງຕາຍຍ້ອນການຈັບຕົວ. ລັດຖະບານຟີລິບປິນກ່າວໃນຫວ່າງມໍ່ໆນີ້ວ່າ: ປີ 2017, ຟີລິບປິນໄດ້ເຂົ້າສູ່ໄລຍະທີສອງຂອງສົງຄາມຕໍ່ຕ້ານຢາເສບຕິດ ເຊິ່ງມີໜ້າທີ່ຕົ້ນຕໍເພື່ອຊ່ວຍບຳບັດຜູ້ຕິດຢາເສບຕິດ.