ມະຫາວິທະຍາໄລສ້າງຄູກວາງຊີ ສປ ຈີນ ເຊິ່ງເປັນມະຫາວິທະຍາໄລຍອດນິຍົມສຳລັບນັກສຶກສາອາຊຽນໄດ້ສ້າງຕັ້ງວິທະຍາໄລປະດິດສ້າງແລະປະກອບທຸລະກິດຈີນ-ອາຊຽນຂຶ້ນໂດຍຈະຊຸກຍູ້ການເຊື່ອມໂຍງເຂົ້າກັນຢ່າງເລິກເຊິ່ງໃນດ້ານວິທະຍາສາດເຕັກໂນໂລຊີ,ການສຶກສາ ແລະວັດທະນະທຳລະຫວ່າງຈີນແລະບັນດາປະເທດອາຊຽນຕື່ມອີກ.
ເຂດປົກຄອງຕົນເອງເຜົ່າຈ້ວງກວາງຊີກັບປະເທດໃນອາຊຽນມີພູຜາແມ່ນ້ຳຕິດຈອດກັນແລະມີວັດທະນະທຳຄ້າຍຄືກັນ. ຕາມສະຖິຕິສະແດງໃຫ້ເຫັນວ່າ ໃນໄລຍະຈັດຕັ້ງປະຕິບັດແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 12, ນັກສຶກສາຈາກປະເທດໃນອາຊຽນທີ່ຄົ້ນຄວ້າຮ່ຳຮຽນຢູ່ກວາງຊີບັນລຸເຖິງ 37.346 ຄົນ ແລະກວາງຊີໄດ້ກາຍເປັນໜຶ່ງໃນບັນດາຈຸດໝາຍປາຍທາງຍອດນິຍົມຂອງນັກສຶກສາປະເທດອາຊຽນໃນການໄປຮຽນຢູ່ຕ່າງປະເທດ ແລະເປັນໜຶ່ງໃນບັນດາເຂດແຂວງຕ່າງໆຂອງຈີນທີ່ມີນັກສຶກສາປະເທດອາຊີຕາເວັນອອກສຽງໃຕ້ຫຼາຍທີ່ສຸດ.
ໃນຖານະເປັນສູນຕົວແບບນັກສຶກສາຕ່າງປະເທດຊຸດທຳອິດຂອງກະຊວງສຶກສາທິການຈີນແລະສູນການສຶກສາພາສາຈີນຂອງຫ້ອງການວຽກງານຊາວຈີນຕ່າງດ້າວ ລັດຖະບານຈີນ, ມະຫາວິທະຍາໄລສ້າງຄູກວາງຊີໄດ້ສ້າງຕັ້ງວິທະຍາໄລປະດິດສ້າງແລະປະກອບທຸລະກິດຈີນ-ອາຊຽນໂດຍຈະອຳນວຍແນວຄິດໃໝ່ແລະເວທີໃໝ່ແຫ່ງການສຶກສາດ້ານການປະດິດສ້າງແລະປະກອບ ທຸລະກິດສຳລັບນັກສຶກສາຕ່າງປະເທດຢູ່ກວາງຊີ, ສົ່ງເສີມມວນຊົນປະກອບທຸລະກິດແລະປະດິດສ້າງໃໝ່ ທັງບຳລຸງກໍ່ສ້າງຊັບພະຍາກອນມະນຸດປະດິດສ້າງແລະປະກອບທຸລະກິດຂອງຈີນແລະອາຊຽນ.
ວິທະຍາໄລທີ່ສ້າງຕັ້ງຂຶ້ນໃໝ່ດັ່ງກ່າວນີ້ມີພາລະໜ້າທີ່ຕົ້ນຕໍຄືປັບປຸງກົນໄກບຳລຸງກໍ່ສ້າງຊັບພະກອນມະນຸດດ້ານການປະດິດສ້າງແລະປະກອບທຸລະກິດໃຫ້ສົມບູນຂຶ້ນ,ກໍ່ສ້າງລະບົບຫຼັກສູນປະດິດສ້າງແລະປະກອບທຸລະກິດ, ເພີ່ມທະວີການປະຕິບັດຕົວຈິງດ້ານປະດິດສ້າງແລະປະກອບທຸລະກິດທີ່ມີເອກະລັກພິເສດຂອງອາຊຽນແລະອື່ນໆ. ຂະນະດຽວກັນຍັງຈະຈັດເອົາການສຶກສາດ້ານການປະດິດສ້າງແລະການປະກອບທຸລະກິດຈີນ-ອາຊຽນເຂົ້າເປັນການສຶກສາວິຊາສະເພາະແລະການສຶກສາວັດທະນະທຳຂອງນັກສຶກສາ, ສ້າງຕັ້ງລະບົບຫຼັກສູດທີ່ມີຫຼາຍລະດັບແລະເປັນຮູບປະທຳ ທັງຈັດເອົາຫຼັກສູດປະດິດສ້າງແລະປະກອບທຸລະກິດໃຫ້ເປັນຫຼັກສູດປົກກະຕິຂອງນັກສຶກສາໂດຍສະເພາະແມ່ນນັກສຶກສາຕ່າງປະເທດ ແລະດຳເນີນການສຶກສາພາກປະຕິບັດຕົວຈິງໃນການປະກອບທຸລະກິດສຳລັບນັກສຶກສາຜູ້ມີເຈດຕະນາປະດິດສ້າງແລະປະກອບທຸລະກິດ.