ວັນທີ 8 ມັງກອນນີ້,ຢູ່ນະຄອນຫຼວງລູຊາກາປະເທດຊຳບີ, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນໄດ້ຢືນຢັນໃນເວລາຮ່ວມກັບທ່ານຮາຣີ ຄາລາບາ ລັດຖະມົນຕີກະຊວງການຕ່າງປະເທດຊຳບີຖະແຫຼງຂ່າວຕໍ່ສື່ມວນຊົນວ່າ ພາຍໃຕ້ການຊີ້ນຳຈາກ ທັດສະນະຄະຕິໃໝ່ຂອງກອງປະຊຸມສຸດຍອດຈອນເນັສເບີກຂອງເວທີປຶກສາຫາລືການຮ່ວມມືຈີນ-ອາຟຣິກກາ 2015, ການຮ່ວມມືແບບຕ່າງຝ່າຍຕ່າງມີຜົນປະໂຫຍດລະຫວ່າງຈີນ-ອາຟຣິກກາປາກົດມີການປ່ຽນແປງໃໝ່ 3 ດ້ານຄື ໜຶ່ງ, ຈາກການນຳພາໂດຍລັດຄ່ອຍໆຫັນປ່ຽນໄປສູ່ການເຄື່ອນໄຫວຂອງຕະຫຼາດເປັນຕົ້ນຕໍ; ສອງ,ຈາກການຄ້າສິນຄ້າທົ່ວໄປຄ່ອຍໆພັດທະນາໄປສູ່ການຮ່ວມມືດ້ານການເພີ່ມຂີດຄວາມສາມາດການຜະລິດແລະການຄ້າການປຸງແຕ່ງສິນຄ້າ; ສາມ, ຈາກການຮັບເໝົາກໍ່ສ້າງໂຄງການຄ່ອຍໆກ້າວໄປສູ່ຂົງເຂດການລົງທຶນ,ການກໍ່ສ້າງແລະການບໍລິຫານໂຄງການ. ທັດສະນະຄະຕິ,ໂຄງປະກອບແລະຜູ້ມີສ່ວນຮ່ວມຕົ້ນຕໍຂອງການຮ່ວມມືຈີນ-ອາຟຣິກກາລ້ວນແຕ່ໄດ້ກ້າວໜ້າໄປພ້ອມຍຸກສະໄໝແລະເຂົ້າສູ່ລວງເລິກຢ່າງບໍ່ຢຸດຢັ້ງ.
ທ່ານຫວາງຢີ້ຊີ້ວ່າ: ການປ່ຽນແປງໃໝ່3ດ້ານດັ່ງກ່າວສະແດງໃຫ້ເຫັນວ່າ ການຮ່ວມມືຈີນ-ອາຟຣິກກາໄດ້ເຂົ້າສູ່ໄລຍະໃໝ່ແຫ່ງການຫັນປ່ຽນຮູບແບບແລະຍົກລະດັບ ແລະກຳລັງພົບໂອກາດໃໝ່ທີ່ຕ່າງຝ່າຍຕ່າງມີຜົນປະໂຫຍດ. ປີ 2017 ເປັນປີສຳຄັນໃນການຈັດຕັ້ງປະຕິບັດຜົນສຳເລັດຂອງກອງປະຊຸມສຸດຍອດເວລທີປຶກສາຫາລືການຮ່ວມມືຈີນ-ອາຟຣິກກາທັງເປັນປີທີ່ຈະປະສົບຜົນສຳເລັດ ແລະຈີນຈະເຄົາລົບແລະປະຕິບັດຕາມຄຳໝັ້ນສັນຍາໂດຍຮ່ວມກັບບັນດາປະເທດໃນອາຟຣິກກາຈັດຕັ້ງປະຕິບັດຜົນສຳເລັດຂອງກອງປະຊຸມສຸດຍອດເວທີປຶກສາຫາລືຢ່າງຮອບດ້ານເພື່ອເຮັດໃຫ້ປະຊາຊົນຈີນແລະອາຟຣິກກາໄດ້ຮັບຜົນປະໂຫຍດຫຼາຍຂຶ້ນໂດຍໄວ.