ຕາມຂ່າວສານຊິນຮວາ:ວັນທີ 9 ມັງກອນນີ້,ທ່ານລູ້ຄ່າງ ໂຄສົກກະຊວງການຕ່າງປະເທດຈີນກ່າວວ່າ,ໂດຍຕອບສະໜອງຕາມຄຳເຊີນຂອງທ່ານສີຈິ້ນຜີງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດສປຈີນ,ທ່ານຫງວຽນຟູຈອງ ເລຂາທິການໃຫຍ່ສູນກາງພັກກອມມູນິດຫວຽດນາດຈະເດີນທາງຢ້ຽມຢາມຈີນຢ່າງເປັນທາງການແຕ່ວັນທີ 12 ຫາວັນທີ 15 ມັງກອນນີ້.ໃນພິທີຖະແຫຼງຂ່າວທີ່ຈັດຂຶ້ນເປັນປະຈຳໃນວັນທີ 9 ມັງກອນນີ້,ທ່ານລູ້ຄ່າງກ່າວວ່າ,ນີ້ແມ່ນການຢ້ຽມຢາມຈີນຂອງສະຫາຍຫງວຽນຟູຈອງເປັນເທື່ອທຳອິດຫຼັງໄດ້ຮັບເລືອກຕັ້ງໃນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ,ຈີນໃຫ້ຄວາມສຳຄັນສູງຕໍ່ເລື່ອງນີ້.ໃນໄລຍະຢ້ຽມຢາມ,ຜູ້ນຳພັກລັດຈີນຈະພົບປະເຈລະຈາກັບທ່ານຫງວຽນຟູຈອງເພື່ອແລກປ່ຽນຄວາມຄິດຄວາມເຫັນກ່ຽວກັບການພົວພັນລະຫວ່າງສອງຝ່າຍແລະບັນຫາທີ່ສົນໃຈຮ່ວມກັນ.ຂະນະດຽວກັນທ່ານຫງວຽນຟູຈອງຍັງຈະເດີນທາງຢ້ຽມຢາມບາງທ້ອງຖິ່ນ.
ທ່ານລູ້ຄ່າງກ່າວວ່າ,ຈີນຍິນດີຮ່ວມກັບຫວຽດນາມສືບຕໍ່ເສີມຂະຫຍາຍໄມຕີຈິດມິດຕະພາບ,ເພີ່ມທະວີການແລກປ່ຽນກັນດ້ານຍຸດທະສາດ,ເພີ່ມຄວາມໄວ້ເນື້ອເຊື່ອໃຈທາງການເມືອງ,ລົງເລິກການຮ່ວມມືທີ່ຕິດແທດຕົວຈິງເພື່ອຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານຈີນ-ຫວຽດນາມໃຫ້ຂະຫຍາຍຕົວຢ່າງຕໍ່ເນື່ອງ ປອດໃສແລະໜັກແໜ້ນ.
 |
