ຫ້ອງການຖະແຫຼງຂ່າວລັດຖະບານຈີນໄດ້ເຜີຍແຜ່ປຶ້ມປົກຂາວ "ນະໂຍບາຍຈີນວ່າດ້ວຍການຮ່ວມມືດ້ານຄວາມໝັ້ນຄົງອາຊີປາຊີຟິກ"ໃນວັນທີ 11 ມັງກອນນີ້.
ປຶ້ມປົກຂາວສະບັບດັ່ງກ່າວມີໂຕໜັງສື 16.000 ໂຕ ປະກອບດ້ວຍ 6 ພາກຄື ຈຸດຢືນນະໂຍບາຍຂອງຈີນກ່ຽວກັບການຮ່ວມມືດ້ານຄວາມໝັ້ນຄົງອາຊີປາຊີຟິກ, ຄວາມໝັ້ນຄົງອາຊີປາຊີຟິກຕາມທັດສະນະຂອງຈີນ, ສາຍພົວພັນລະຫວ່າງຈີນກັບປະເທດໃນພາກພື້ນອາຊີປາຊີຟິກ,ຫຼັກໝັ້ນແລະຈຸດຢືນຂອງຈີນໃນບັນຫາຈຸດສຸມໃນພາກພື້ນ, ກົນໄກຫຼາຍຝ່າຍສຳຄັນຂອງພາກພື້ນອາຊີປາຊີຟິກທີ່ຈີນມີສ່ວນຮ່ວມແລະການຮ່ວມມືຮັກສາຄວາມໝັ້ນຄົງແບບໃໝ່ໃນພາກພື້ນທີ່ຈີນມີສ່ວນຮ່ວມ.
ປຶ້ມປົກຂາວຍັງແນະນຳການເຂົ້າຮ່ວມຮ່ວມມືຮັກສາຄວາມໝັ້ນຄົງແບບໃໝ່ໃນພາກພື້ນຂອງຈີນເປັນຕົ້ນ ການກູ້ໄພ,ການຕ້ານການກໍ່ການຮ້າຍ, ການປາບປາມອາຊະຍາກຳຂ້າມຊາດ,ຄວາມປອດໄພດ້ານອິນເຕີເນັດ,ຄວາມໝັ້ນຄົງທາງທະເລ, ການປ້ອງກັນການແຜ່ຜາຍອາວຸດກັບການຫຼຸດກຳລັງຮົບແລະອື່ນໆ.
ປຶ້ມປົກຂາວຍັງລະບຸວ່າ: ປະຊາຊົນຈີນກຳລັງ ສູ້ຊົນເພື່ອບັນລຸຄວາມຝັນໃນການຟື້ນຟູຄວາມຈະເລີນຮຸ່ງເຮືອງຂອງຊາດ ຄືນໃໝ່ຢ່າງຍິ່ງໃຫຍ່ ແລະໃນຂະບວນການດັ່ງກ່າວ, ຈີນຈະນຳເອົາໂອກາດຮ່ວມມືແລະຜົນປະໂຫຍດຈາກການພັດທະນາໄປສູ່ພາກພື້ນອາຊີປາຊີຟິກໃຫ້ຫຼາຍຂຶ້ນກວ່າເກົ່າ. ຈີນຍິນດີຮ່ວມກັບບັນດາປະເທດໃນພາກພື້ນນີ້ຍຶດໝັ້ນການຮ່ວມມືແບບຕ່າງຝ່າຍຕ່າງມີຜົນປະໂຫຍດ,ສົ່ງເສີມການເຈລະຈາແລະການຮ່ວມມືດ້ານຄວາມໝັ້ນຄົງອາຊີປາຊີຟິກ, ສົ່ງເສີມການສ້າງສາຍພົວພັນລະຫວ່າງຊາດແບບໃໝ່ແລະຮ່ວມກັນສ້າງອະນາຄົດໃນການພັດທະນາພາກພື້ນອາຊີປາຊີຟິກໃຫ້ສີວິໄລກວ່າເກົ່າ.