ວັນທີ 12 ມັງກອນນີ້, ຢູ່ຫໍສະພາປະຊາຊົນແຫ່ງຊາດໃນນະຄອນຫຼວງປັກກິ່ງ, ທ່ານ ສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນໄດ້ພົບປະກັບທ່ານ ຫງວຽນຟູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ແລະໃນໂອກາດດັ່ງກ່າວ,ສອງຝ່າຍໄດ້ເປັນເອກະພາບກັນວ່າ: ຄວນຍຶດໝັ້ນທິດທາງ "ມີຄວາມໝັ້ນຄົງຢ່າງຍາວນານ,ອວ່າຍໜ້າໄປສູ່ອະນາຄົດ,ມິດຕະພາບຕໍ່ກັນຖານບ້ານໃກ້ເຮືອນຄຽງທີ່ດີ,ການຮ່ວມມືຢ່າງຮອບດ້ານ" ລວມທັງຈິດໃຈ "ບ້ານໃກ້ຄຽງທີ່ດີ,ເພື່ອນມິດທີ່ດີ,ສະຫາຍທີ່ດີ,ຄູ່ຮ່ວມມືທີ່ດີ", ສຸມໃສ່ສະພາບລວມ,ເບິ່ງກວ້າງມອງໄກ,ພະຍາຍາມບັນລຸເປົ້າໝາຍ,ຫັນໜ້າເຂົ້າຫາກັນ,ຊຸກຍູ້ສາຍພົວພັນລະຫວ່າງຈີນ-ຫວຽດນາມໃຫ້ຂະຫຍາຍຕົວຕາມເສັ້ນທາງທີ່ຖືກຕ້ອງ.
ທ່ານ ສີຈິ້ນຜິງ ໄດ້ສະເໜີ 7 ຂໍ້ກ່ຽວກັບການເສີມຂະຫຍາຍສາຍພົວພັນລະຫວ່າງຈີນ-ຫວຽດນາມຕື່ມອີກເປັນຕົ້ນ ໜຶ່ງ, ເພີ່ມທະວີການຊຸກຍູ້ຂອງການນຳຂັ້ນສູງ,ເພີ່ມຄວາມໄວ້ເນື້ອເຊື່ອໃຈກັນທາງການເມືອງ. ສອງ,ລົງເລິກການຮ່ວມມືລະຫວ່າງສອງພັກ,ຊຸກຍູ້ການແລກປ່ຽນແລະຖອດຖອນບົດຮຽນຮ່ວມກັນ. ສາມ,ລົງເລິກການຮ່ວມມືທີ່ແທ້ຈິງ,ເລັ່ງການເຊື່ອມຕໍ່ກັນທາງດ້ານຍຸດທະສາດ. ສີ່,ເປີດກວ້າງການໄປມາຫາສູ່ກັນລະຫວ່າງສອງກອງທັບ,ລົງເລິກການຮ່ວມມືດ້ານຄວາມໝັ້ນຄົງ. ຫ້າ,ເພີ່ມທະວີການໄປມາຫາສູ່ກັນລະຫວ່າງປະຊາຊົນສອງຊາດ,ສ້າງພື້ນຖານທາງຈິດໃຈປະຊາຊົນໃຫ້ໜັກແໜ້ນ, ຫົກ,ຄຸ້ມຄອງແລະຄວບຄຸມຄວາມຂັດແຍ້ງກັນຢ່າງເໝາະສົມ,ຊຸກຍູ້ການຮ່ວມມືທາງທະເລ ແລະ ເຈັດ,ເພີ່ມທະວີການປະສານງານໃນສາກົນ,ປົກປ້ອງຜົນປະໂຫຍດຮ່ວມກັນ. ນອກຈາກນີ້,ຈີນພ້ອມສະໜັບສະໜູນຫວຽດນາມໃນການຈັດກອງປະຊຸມບໍ່ເປັນທາງການຂອງຜູ້ນຳອົງການຮ່ວມມືດ້ານເສດຖະກິດອາຊີປາຊີຟິກ(APEC)ປີ 2017.
ທ່ານ ຫງວຽນຟູຈ້ອງ ກ່າວດ້ວຍຄວາມເຫັນດີຢ່າງເຕັມສ່ວນຕາມຂໍ້ສະເໜີຂອງທ່ານ ສີຈິ້ນຜິງ ຕໍ່ການເສີມຂະຫຍາຍການພົວພັນລະຫວ່າງສອງພັກ-ສອງລັດ. ຂະນະດຽວກັນຫວຽດນາມກໍຍິນດີຮ່ວມກັບຈີນ ດຳເນີນການເຊື່ອມຕໍ່ທາງຍຸດທະສາດ "ສອງແລວເສດຖະກິດໜຶ່ງສູນ" ກັບ "ໜຶ່ງແລວທາງໜຶ່ງເສັ້ນທາງ", ເພີ່ມທະວີແລະເປີດກວ້າງການຮ່ວມມືທາງທະເລລະຫວ່າງສອງຝ່າຍ,ຍົກການພົວພັນລະຫວ່າງສອງປະເທດໃຫ້ຂຶ້ນສູ່ລະດັບໃໝ່,ປະກອບສ່ວນເຂົ້າໃນການຊຸກຍູ້ການພັດທະນາແລະສັນຕິພາບຂອງພາກພື້ນກໍຄືຂອງໂລກ.
ຫຼັງການພົບປະ,ທ່ານ ສີຈິ້ນຜິງ ແລະ ທ່ານ ຫງວຽນຟູຈ້ອງໄດ້ຮ່ວມກັນເປັນສັກຂີພິຍານໃນພິທີລົງນາມໃນສັນຍາການຮ່ວມມືທີ່ກ່ຽວຂ້ອງລະຫວ່າງສອງຝ່າຍ.