ທ່ານຢີເຈີ້ງເສີງພົບປະທ່ານຫງວຽນຟູຈ໋ອງແລະຮ່ວມກັນເຂົ້າຮ່ວມກິດຈະກຳມິດຕະພາບເພື່ອສະຫຼອງຈີນ-ຫວຽດນາມສ້າງສາຍພົວພັນທາງການທູດຄົບຮອບ 67 ປີ
ຕາມຂ່າວCRI: ວັນທີ 13 ມັງກອນນີ້, ທ່ານຢີເຈີ້ງເສີງ, ກຳມະການປະຈຳກົມການເມືອງສູນກາງພັກກອມມູນິດຈີນ, ປະທານສະພາປຶກສາການເມືອງປະຊາຊົນຈີນໄດ້ພົບປະກັບທ່ານຫງວຽນຟູຈ໋ອງ, ເລຂາທິການໃຫຍ່ສູນກາງພັກກອມມູນິດຫວຽດນາມຢູ່ນະຄອນຫຼວງປັກກິ່ງ.
ທ່ານຢີເຈີ້ງເສີງກ່າວວ່າ, ພາຍໃຕ້ການນຳພາຂອງຜູ້ນຳສູງສຸດສອງຝ່າຍ, ການພົວພັນລະຫວ່າງຈີນກັບຫວຽດນາມໃນປັດຈຸບັນນີ້ໄດ້ກ້າວເຂົ້າສູ່ໄລຍະໃໝ່ທີ່ມີການຂະຫຍາຍຕົວຢ່າງຕໍ່ເນື່ອງ, ປອດໄສແລະໝັ້ນທ່ຽງ, ສະພາບຄືແນວນີ້ກຳເນີດມາບໍ່ງ່າຍ, ຕ້ອງທະນຸຖະໜອມ. ສອງຝ່າຍຕ້ອງກຳໂອກາດໃຫ້ດີ, ເພີ່ມທະວີການແລກປ່ຽນດ້ານຍຸດທະສາດຕື່ມອີກ, ເພີ່ມຄວາມໄວ້ເນື້ອເຊື່ອໃຈກັນດ້ານການເມືອງ, ຊຸກຍູ້ການຮ່ວມມືຕົວຈິງ, ເປີດກວ້າງການແລກປ່ຽນດ້ານວັດທະນະທຳ, ເພີ່ມພະລັງແຮງໃໝ່ເຂົ້າໃນການຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນກັບຫວຽດນາມ.
ທ່ານຫງວຽນຟູຈ໋ອງກ່າວວ່າ, ການເພີ່ມທະວີໄມຕີຈິດມິດຕະພາບອັນເປັນມູນເຊື້ອລະຫວ່າງຈີນ-ຫວຽດນາມ, ການຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດແມ່ນຄວາມຮັບຮູ້ທີ່ເປັນເອກະພາບກັນລະຫວ່າງຫວຽດນາມ ກັບຈີນ. ຫວຽດນາມຫວັງວ່າສອງຝ່າຍຈະຮັດແໜ້ນການຮ່ວມມື, ເພີ່ມທະວີການແລກ່ປຽນລະຫວ່າງປະຊາຊົນສອງຊາດ, ປະກອບສ່ວນໃຫ້ຫຼາຍກວ່າເກົ່າເຂົ້າໃນການເຮັດໃຫ້ມິດຕະພາບລະຫວ່າງປະຊາຊົນສອງປະເທດເລິກເຊິ່ງກວ່າເກົ່າແລະການຂະຫຍາຍການພົວພັນລະຫວ່າງສອງຝ່າຍ.
ພາຍຫຼັງການພົບປະ, ທ່ານຢີເຈີ້ງເສີງກັບທ່ານຫງວຽນຟູຈ້ອງໄດ້ຮ່ວມກັນເຂົ້າຮ່ວມກິດຈະກຳມິດຕະພາບເພື່ອສະຫຼອງຈີນກັບຫວຽດນາມສ້າງສາຍພົວພັນທາງການທູດຄົບຮອບ 67 ປີ ກໍ່ຄື ກິດຈະກຳມິດຕະພາບຕ້ອນຮັບປີໃໝ່ 2017.