ທ່ານໂຣດຣີໂກ ດູເຕີເຕ ປະທານາທິບໍດີຟີລິບປິນຖະແຫຼງຢູ່ເມືອງດາວາວ ທາງພາກໃຕ້ຂອງປະເທດຕົນໃນຕອນບ່າຍວັນທີ 15 ມັງກອນນີ້ວ່າ: ຟີລິບປິນໄດ້ດຳລົງຕຳແໜ່ງເປັນປະທານໝູນວຽນອາຊຽນຢ່າງເປັນທາງການນັບແຕ່ວັນທີ 15 ມັງກອນນີ້ເປັນຕົ້ນໄປ. ໜັງສືພິມBusiness World ຟີລິບປິນລາຍງານວ່າ: ທ່ານດູເຕີເຕໃຫ້ສັນຍາໃນພິທີຂຶ້ນດຳລົງຕຳແໜ່ງປະທານອາຊຽນວ່າ: ຈະເລັ່ງສົ່ງເສີມຄວາມໝັ້ນຄົງແລະການຄຸ້ມຄອງຕາມກົດໝາຍທາງທະເລ ທັງເລັ່ງໃຫ້ປະເທດຄູ່ເຈລະຈາຂອງອາຊຽນເຊິ່ງລວມທັງອາເມລິກາຢ່າແຊກແຊງວຽກງານອາຊຽນ.
ທ່ານດູເຕີເຕຢືນຢັນວ່າ: ເນື່ອງຈາກບັນຫາທະເລຈີນໃຕ້ເຮັດໃຫ້ຟີລິບປິນກັບຈີນແລະຫຼາຍປະເທດຕົກຢູ່ໃນຂໍ້ຂັດແຍ້ງດ້ານດິນແດນ. ຈາກນີ້,ໃນໄລຍະດຳລົງຕຳແໜ່ງເປັນປະທານອາຊຽນປີນີ້, ຟີລິບປິນຈະກຳນົດວຽກງານສຳຄັນໂດຍເນັ້ນສ້າງສະຖຽນລະພາບໃນພາກພື້ນແລະຄວາມໝັ້ນຄົງທາງທະເລ. ຂະນະທີ່ເມື່ອບໍ່ດົນມານີ້ວ່າ: ທ່ານຊິນໂຈອາເບະ ນາຍົກລັດຖະມົນຕີຍີ່ປຸ່ນໄດ້ກ່າວໃນໂອກາດຮ່ວມກັບທ່ານດູເຕີເຕຖະແຫຼງຂ່າວຕໍ່ສື່ມວນຊົນໃນວັນທີ 12 ມັງກອນນີ້ວ່າ ຫວັງຈະເອົາບັນຫາທະເລຈີນໃຕ້ເຂົ້າໃນວາລະກອງປະຊຸມອາຊຽນ. ແຕ່ລັດຖະບານຟີລິບປິນໄດ້ຢືນຢັນຢ່າງຈະແຈ້ງເມື່ອກ່ອນໜ້ານີ້ຫຼາຍມື້ແລ້ວວ່າໃນໄລຍະທີ່ປະເທດຕົນດຳລົງຕຳແໜ່ງເປັນປະທານອາຊຽນນັ້ນຈະບໍ່ເອົາບັນຫາທະເລຈີນໃຕ້ເຂົ້າໃນວາລະກອງປະຊຸມອາຊຽນຢ່າງເດັດຂາດ.