ທ່ານຫງວຽນຟູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ເດີນທາງຢ້ຽມຢາມແຂວງເຈີ້ຈ່ຽງ ສປ ຈີນ ແຕ່ວັນທີ 14-15 ມັງກອນນີ້ ໂດຍທ່ານພ້ອມດ້ວຍຄະນະ ໄດ້ໄປທັດສະນະສຶກສາຍ່ານຖະໜົນປະຫວັດສາດຊິ່ງເຫີຟາງ ແລະ ທ່ຽມຊົມໜອງຊີ່ຫູ ເມືອງຫັງໂຈ່ວ ເທສະບານແຂວງດັ່ງກ່າວ ທັງໄດ້ພົບປະກັບຜູ້ຕາງໜ້ານັກທຸລະກິດຈີນ ແລະທັດສະນະສຶກສາວິສາຫະກິດເອກະຊົນອີກດ້ວຍ.
ທ່ານຫງວຽນຟູຈ້ອງ ກ່າວວ່າ: ປະເທດຕົນໄດ້ຮັກສາການພົວພັນທີ່ດີກັບຫຼາຍແຂວງຂອງຈີນ ລວມທັງແຂວງເຈີ້ຈ່ຽງ. ແນວໃດກໍດີ ໃນໄລຍະຢ້ຽມຢາມຈີນເທື່ອນີ້, ສອງຝ່າຍໄດ້ເປັນເອກະພາບກັນສົ່ງເສີມການຮ່ວມມືລະດັບທ້ອງຖິ່ນ ແລະ ຫວັງວ່າແຂວງເຈີ້ຈ່ຽງຈະສືບຕໍ່ເສີມຂະຫຍາຍບົດບາດທີ່ຕັ້ງໜ້າໃນການຮ່ວມມືລະຫວ່າງສອງຝ່າຍ. ຂະນະດຽວກັນ, ກໍຫວັງວ່າວິສາຫະກິດຈີນຈະເພີ່ມການລົງທຶນຢູ່ປະເທດຕົນໃນຂົງເຂດເຕັກນິກກ້າວໜ້າທັນສະໄໝ ແລະ ຍົກປະສິດທິພາບການຮ່ວມມືລະຫວ່າງວິສາຫະກິດຂອງສອງປະເທດໃຫ້ສູງຂຶ້ນອີກ.
ຂະນະທີ່ພະແນກການຄ້າແຂວງເຈີ້ຈ່ຽງເປີດເຜີຍວ່າ, ມີ 186 ວິສາຫະກິດແຂວງຕົນລົງທຶນຢູ່ຫວຽດນາມ ແລະແຕ່ເດືອນມັງກອນຫາເດືອນພະຈິກປີຜ່ານມາ, ມູນຄ່າການນຳເຂົ້າ-ສົ່ງອອກລະຫວ່າງແຂວງຕົນກັບຫວຽດນາມບັນລຸເຖິງ 6 ຕື້ 160 ລ້ານໂດລາສະຫະລັດ.
