ມະຫາວິທະຍາໄລຊົນເຜົ່າຢຸນນານແລະອຳນາດການປົກຄອງເມືອງຣຸ້ຍລີ້ກິ່ງແຂວງເຕີຫົງ ແຂວງຢຸນນານ ສປ ຈີນ ໄດ້ຈັດພິທີລົງນາມສ້າງຕັ້ງ "ວິທະຍາໄລວິຊາຊີບສາກົນແມ່ນ້ຳລ້ານຊ້າງ-ແມ່ນ້ຳຂອງ ມະຫາວິທະຍາໄລຊົນເຜົ່າຢຸນນານ" ຢູ່ເມືອງຄຸນມິງໃນວັນທີ 15 ມັງກອນນີ້ ໂດຍວິທະຍາໄລວິຊາຊີບແຫ່ງນີ້ຈະຕັ້ງຢູ່ແຂວງຢຸນນານ ແລະຈະຫັນໜ້າສູ່ທົ່ວປະເທດ ລວມທັງປະເທດແມ່ນ້ຳຂອງ ເພື່ອສຸມໃສ່ສ້າງບຸກຄະລາກອນດ້ານເຕັກນິກ-ວິຊາຊີບທີ່ມີຄຸນນະພາບສູງ ຮອງຮັບຄວາມຮຽກຮ້ອງຕ້ອງການໃນການຮ່ວມມືພັດທະນາເສດຖະກິດລະຫວ່າງ 6 ປະເທດແມ່ນ້ຳລ້ານຂ້າງ-ແມ່ນ້ຳຂອງ. ຂະນະທີ່ທ່ານເຈິ້ງເສຟ່າງ ທີ່ປຶກສາທູດກົມອາຊີ ກະຊວງການຕ່າງປະເທດຈີນ ກ່າວວ່າ: ການສ້າງຕັ້ງວິທະຍາໄລວິຊາຊີບສາກົນແມ່ນ້ຳລ້ານຊ້າງ-ແມ່ນ້ຳຂອງ ຈະມີຜົນດີຕໍ່ການສະໜັບສະໜູນບັນດາປະເທດອະນຸພາກພື້ນແມ່ນ້ຳຂອງທາງດ້ານບຸກຄະລາກອນແລະສະຕິປັນຍາຂອງຈີນ.
ມື້ດຽວກັນກໍໄດ້ເປີດສູນສຶກສາວິຊາຊີບແມ່ນ້ຳລ້ານຊ້າງ-ແມ່ນ້ຳຂອງ ແລະ ສະຫະພັນການສຶກສາວິຊາຊີບແມ່ນ້ຳລ້ານຊ້າງ-ແມ່ນ້ຳຂອງ ໂດຍມີວິທະຍາໄລເຕັກນິກ-ວິຊາຊີບ 14 ແຫ່ງໃນແຂວງຢຸນນານເຂົ້າຮ່ວມ ເຊິ່ງຈະສ້າງບຸກຄະລາກອນຕາມຄວາມຕ້ອງການໃນ 5 ຂົງເຂດສຳຄັນແຫ່ງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໂດຍພື້ນຖານ. ຂະນະທີ່ສະຫະພັນດັ່ງກ່າວເປັນອົງການຈັດຕັ້ງສາກົນແບບເປີດກວ້າງແຫ່ງການແລກປ່ຽນແລະຮ່ວມມືດ້ານການສຶກສາວິຊາຊີບລະຫວ່າງ 6 ປະເທດແມ່ນ້ຳລ້ານຊ້າງ-ແມ່ນ້ຳຂອງ ແລະປັດຈຸບັນໄດ້ເຊັນສັນຍາຮ່ວມມືກັບໂຮງຮຽນແລະວິສາຫະກິດຫຼາຍແຫ່ງຂອງ 6 ປະເທດດັ່ງກ່າວ.