ແຫຼ່ງຂ່າວຈາກພະແນກທາງລົດໄຟເມືອງຄຸນມິງ ສປ ຈີນໃຫ້ຮູ້ໃນວັນທີ 16 ມັງກອນນີ້ວ່າ: ອຸມົງເມິ້ງມ໋າ 2 ຕາມທາງລົດໄຟຕ້າຫຼິນ ເຊິ່ງແມ່ນສ່ວນສຳຄັນຂອງທາງລົດໄຟສາກົນຈີນ-ມຽນມາ ໄດ້ທະລຸສຳເລັດແລ້ວ ແລະເປັນອຸມົງແຫ່ງທຳອິດທີ່ທະລຸສຳເລັດຕາມທາງລົດໄຟຕ້າຫຼິນ.
ທາງລົດໄຟຕ້າຫຼິນເລີ່ມແຕ່ເມືອງຕ້າຫຼີ ພາກເໜືອແຂວງຢຸນນານ ແລະຜ່ານເມືອງເວີ້ຍຊ່ານ, ເມືອງຢຸນຊ້ຽນຂອງເມືອງຕ້າຫຼີ ທະລຸລົງສູ່ພາກໃຕ້ຈົນເຖິງເຂດຫຼິນສຽງ ເມືອງຫຼິນຊ່າງແຂວງດຽວກັນ ຍາວ 202 ກິໂລແມັດ ແລະ ແລ່ນໃນຄວາມໄວ 160 ກິໂລແມັດຕໍ່ຊົ່ວໂມງ. ສຳລັບອຸມົງເມິ້ງມ໋າ 2 ຕັ້ງຢູ່ບໍລິເວນໃກ້ບ້ານເນີ້ຍປ່າງ ທາງພາກເໜືອເມືອງຫຼິນຊ່າງ ພາກຕາເວັນຕົກແຂວງຢຸນນານ ຍາວ 253 ແມັດ. ຂະນະທີ່ການກໍ່ສ້າງທາງລົດໄຟຕ້າຫຼິນ ເຊິ່ງແມ່ນຕອນໜຶ່ງຂອງທາງລົດໄຟສາກົນຈີນ-ມຽນມາ ຈະມີຄວາມໝາຍສຳຄັນທາງຍຸດທະສາດຕໍ່ການບັນລຸການເຊື່ອມຈອດລະຫວ່າງແຂວງຢຸນນານກັບປະເທດອ້ອມຂ້າງ ແລະ ຮັບໃຊ້ໃຫ້ແກ່ການສ້າງ "ໜຶ່ງແລວທາງໜຶ່ງເສັ້ນທາງ".